Парите назад за 14 дена ако ви пропадне патувањето: Нови правила во ЕУ!

За патниците во Европската унија ќе биде полесно да побараат поврат на средства во случај на нарушување на патувањето, дури и ако билетот го резервирале преку туристичка агенција или онлајн платформа. Европскиот парламент одобри нови правила со кои се воведува стандардизиран образец за барање, рок од 14 дена за поврат на средствата, како и бесплатно патување за придружник на лице со попреченост, кога тоа е потребно.

Европскиот парламент ги усвои новите правила – чија цел е да обезбедат подобра заштита за патниците во случај на нарушувања во патувањето – со речиси едногласно гласање.

Патниците низ Европската унија ќе можат да поднесат барање за поврат на средства преку единствен, стандардизиран образец, кој ќе биде достапен на веб-страницата на Европската комисија на сите официјални јазици на ЕУ. Овој образец ќе важи за сите видови транспорт.

Според новите правила, патниците имаат право на целосен поврат на средствата во рок од 14 дена. Оваа обврска за поврат на средства се однесува и на посредниците – како што се туристичките агенции и платформите за онлајн резервации – што претходно не беше јасно дефинирано во регулативите.

Доколку посредникот не изврши поврат на средствата во предвидениот рок, авиокомпанијата ќе биде должна да интервенира и да му ги исплати средствата на патникот.

„Ги ставаме правата на нашите граѓани пред профитот на авиокомпаниите“, изјави италијанскиот социјалист Матео Ричи, пратеник во Европскиот парламент одговорен за оваа легислатива. Бесплатно патување за придружници на лица со попреченост
Новите правила дополнително ги зајакнуваат правата на лицата со попреченост. Кога е потребно, нивниот придружник ќе може бесплатно да патува со нив во авионскиот сообраќај.

Оваа можност веќе постои во автобускиот, железничкиот и поморскиот транспорт, а со новите правила таа се проширува и на авионскиот транспорт.

652 пратеници во Европскиот парламент гласаа „за“ регулативата, двајца гласаа „против“, а осуммина беа воздржани.

Новите правила се надоврзуваат на големата реформа на правата на патниците во авионскиот сообраќај, усвоена во јули. Таа реформа го олесни остварувањето на правото на поврат на средства и ги обврза авиокомпаниите во цените прикажани онлајн да вклучат еден рачен багаж, без дополнителни трошоци.