Во март отстранети 2.315 кубни метри отпад од диви депонии

Eкипите на јавното претпријатие „Комунална хигиена“, во текот на март подигнале и транспортирале 14. 086 тони мешан комунален отпад од домаќинствата на територијата на Скопје.

-Отстранети се и 2.315 кубни метри мешан комунален, кабаст и градежен отпад одожен на јавни и сообраќајни површини во сите скопски општини. Најголемо количество непрописно одложен отпад – 540 кубни метри е подигнат во општината Карпош – соопштија од претпријатието.

Оттаму информираат дека продолжуваат со одржување на јавната хигиена на скопските булевари, како и улиците што се во надлежност на Град Скопје.

-Секојдневно, во три смени, се спроведува машинско и рачно метење на  Градскиот плоштад и улицата „Македонија“, помалите плоштади: „Филип Втори“, „Мајка Тереза“ и „Богородица“, пешачките мостови во централното градско подрачје, пешачките патеки и тротоарите на мостовите „Гоце Делчев”, и „Слобода”, како и Старата скопска чаршија  – наведуваат од ЈП „Комунална хигиена“. 

Претпријатието го започна и сезонското машинско миење со употреба на автоцистерни што секојдневно се реализира во доцните вечерни часови.
ЈП „Комунална хигиена“ во март реализираше еко-предавања и работилници во скопските училишта, во чиишто рамки 232 ученика беа запознати како преку правилното постапување со отпадот и примарната селекција да ја заштитат својата животна околина.