Раст од 16,7% проценти на цената на становите

Во првиот квартал годинава становите во Скопје поскапеле за 16,7% на годишно ниво, а за 0,1% на квартално, покажува индексот на цени на недвижности што го објавува Народната банка, врз основа на податоци кои се однесуваат на огласени станови за продажба на територијата на главниот град.

Минатата година, во првиот квартал становите забележаа годишно поскапување за 19,5%, во вториот за 19,9%, во третиот од 25,1%, а во четвртиот од 25%.

Агенцијата за катастар на недвижности во Извештајот од Регистарот на цени и закупнини на пазарот на недвижностите за 2025 година наведе дека за годинава се прогнозира умерен раст на пазарот со зголемен интерес за инвестиции и продолжен раст на закупи.

Во 2025 година становите останаа најдоминантен сегмент на пазарот и учествуваа со 33  проценти во вкупниот број купопродажби и 48% од вкупната вредност на пазарот. Иако бројот на продадени станови е намален за 3,9%, нивната вредност пораснала за 10,8%.

Најактивни општини се Центар, Аеродром и Карпош, кои исто така имаат и највисоки просечни цени на становите, од 1.692 евра/м²; 1.558 евра/м² и 1.419 евра/м².

Најскапиот стан е продаден во Аеродром за 166.500 евра, а најскапата куќа е продадена во општина Центар за 1.500.000 евра.  Најскап деловен простор е продаден во општина Центар за 6.800.000 евра.