Во експлозијата во Монако тешко е повредена љубовницата, а не сопругата на украинскиот тајкун/ФОТО

Жената која е тешко повредена во експлозија на бомба во Монако, за која се сомнева дека цел на нападот бил украинскиот олигарх Вадим Јермолаев (58), не е негова сопруга, туку неговата долгогодишна љубовница Ана Насобина (46), со која има 13-годишен син.

Според медиумските извештаи, Насобина ги изгубила двете нозе во експлозијата.

Насобина, чиј 13-годишен син со Јермолаев исто така беше повреден во нападот, сега се бори за живот на интензивна нега во болницата, како и нејзиниот партнер, објавува „Дејли меил“.

Првичните извештаи укажуваа дека другата жртва на експлозијата била сопругата на Јермолаев, Ана Јермолаев (56), со која има четири деца.

Сепак, сега се дозна дека тој во времето на експлозијата во понеделникот вечерта всушност бил со својата долгогодишна љубовница, Ана Насобина, која живее во Лондон.

Сопругата на Јермолаев изјави за украинскиот државен медиум „Суспилне“: „Моментално сме под голем стрес и активно соработуваме со истрагата и службите за спроведување на законот“

„Со Јермолаев во времето на експлозијата не била неговата сопруга. Токму оваа жена ги изгубила нозете и е на работ на животот и смртта. Јермолаев бил со својата љубовница Ана Насобина. Тие се заедно долго време. Имаат 13-годишно дете заедно“, напиша украинскиот политички блогер Анатолиј Шариј.

‘Oligarch’s mistress is woman who lost both legs in Monaco bomb blast’: She fights for life ‘as it emerges child also wounded is their son’ https://t.co/U0ehMCqG7O

— Daily Mail (@DailyMail) July 1, 2026

Насобина, која некои ја опишаа како „невенчана сопруга“ на тајкунот, е по потекло од градот Дњепар во Украина. Таа е ќерка на поранешниот прв заменик-обвинител на регионот Днепропетровск.

Неофицијални детали за истрагата

Извештаите од Франција сугерираат дека истражителите ја истражуваат можната вмешаност на Службата за безбедност на Украина (SBU) во наводниот обид за атентат, во кој се ранети Јермолаев, Насобина и нивниот син.

Украинската полиција претходно изјави дека олигархот можеби бил цел поради наводни врски со измама со кол-центар вредна 100 милиони евра.

Полициски извори тврдат дека насилниот напад е директно поврзан со мрежа од лажни кол-центри во Дњепар, Украина, кои наводно се користат за извршување големи финансиски измами низ цела Европа.

Украинскиот весник „Украинска правда“ објави дека обидот за атентат произлегол од неуспешен договор за поделба на територијата и неплатени долгови наводно на шефовите на организираниот криминал во Дњепар.

Како и многу олигарси кои се збогатиле по падот на Советскиот Сојуз, Јермолаев се соочил со кривични обвиненија, вклучително и перење пари, што тој ги негирал.

Тој се откажал од украинското државјанство во 2019 година и добил кипарски пасош, а во декември 2023 година, Киев му воведе лични санкции.

Франција помага во потрагата по осомничениот. Помошник на францускиот министер за внатрешни работи Лоран Нуњез вчера изјави дека полицијата работи „на пронаоѓање на сторителот, кој избегал“.

Весникот „Нис-Матин“ објави тврдење дека Јермолаев планирал да одржи говор пред Европскиот парламент во кој ќе ја спомене корупцијата во Украина.