Вашингтон не го исклучува и најопасното сценарио за Иран: Пентагон веќe има направено детални подготовки

Функционерите на Пентагон направија детални подготовки за распоредување на американски копнени сили во Иран, изјавија повеќе извори запознаени со разговорите за „Си-би-ес њуз“.

Високи воени команданти упатија конкретни барања насочени кон подготовка за таква опција, додека американскиот претседател Доналд Трамп разгледува чекори во конфликтот со Иран предводен од САД и Израел, велат изворите.

Трамп размислува дали да распореди копнени сили во регионот, велат изворите, зборувајќи под услов на анонимност бидејќи не биле овластени јавно да зборуваат. Не беше јасно под кои околности би одобрил употреба на војници на терен.

„Не, не испраќам војници никаде“, им рече тој на новинарите во Овалната соба во четврток кога беше прашан за копнените сили, но брзо додаде: „Да го првам тоа, сигурно не би ви кажал“.

Функционерите на Централната команда на САД ги упатија прашањата на CBS News до Белата куќа и Пентагон.

Портпаролката на Белата куќа, Каролин Ливит, во соопштението изјави: „Работата на Пентагон е да се подготви да му даде на врховниот командант максимален избор, тоа не значи дека претседателот донел одлука и како што претседателот вчера изјави во Овалната соба, тој нема планови да испраќа копнени трупи никаде во овој момент.“

Војската, исто така, одржа состаноци за да се подготви за можни апсења на ирански војници и паравоени оперативци доколку Трамп одлучи да распореди американски војници на терен – вклучително и каде би биле испратени Иранците, изјавија два извори.

САД се подготвуваат да распоредат елементи од 82-та воздушно-десантна дивизија во регионот на Блискиот Исток.

Илјадници маринци сега се преместуваат на Блискиот Исток. Три воени бродови и околу 2.200 маринци од експедициска сила ја напуштија Калифорнија претходно оваа недела, според двајца американски претставници. Тоа беше втора таква морска сила што беше испратена од почетокот на војната и може да поминат недели пред да се распореди. Првата беше испратена од Пацификот и сè уште се движи кон регионот.

Овие потези ги нагласуваат напорите на Пентагон да ги прошири воените опции што му се достапни на претседателот, дури и кога претставниците на администрацијата одбија јавно да разговараат за потенцијалните следни чекори.