Нејзината фотографија и личните податоци се објавени на европска листа на барани лица; според описот, таа е осудена на пет години затвор.
Европол утрово соопшти дека ја ажурирал својата листа „Најбарани во ЕУ“ (EU Most Wanted), додавајќи 19 нови имиња на бегалци кои се бараат поради сомневања за кривични дела извршени врз деца и постари лица.
„Деветнаесет бегалци, барани за кривични дела против деца и постари лица, се во фокусот на новиот апел во рамките на листата ’Најбарани во ЕУ‘, лансиран на 12 ноември. Апелот, кој опфаќа случаи од 14 земји, вклучува поединци кои се бараат за сексуална експлоатација на деца и за измами насочени кон постари лица“, наведуваат од Европол.
На листата се наоѓа и жена од Србија – идентификувана како Радмила – која ја бара Италија. Во „јавното известување за потрага“, во кое е вклучена и нејзината фотографија, се наведува дека таа е осомничена за измами и изнуди насочени кон лица постари од 60 години.
„Таа е висока 162 сантиметри и има кафеави очи. Родена е на 31 октомври 1996 година и е осудена на пет години затвор. Зборува српски јазик“, се вели во описот.
Европската мрежа на тимови за активно трагање по бегалци (ENFAST), поддржана од Европол, ги повика граѓаните да ѝ помогнат на полицијата со споделување какви било информации што ги имаат за неа или за другите бегалци. „Не ѝ приоѓајте на бараната личност. Споделете ги информациите со надлежните органи анонимно преку веб-страницата“, стои на страницата „Најбарани во ЕУ“.
Вреди да се напомене дека пред околу десет дена, на листата на најбарани бегалци во Европа беа додадени и членови на групата „Пинк Пантер“ од Србија, при што беше понудена и парична награда за информации што би довеле до нивно апсење.
Кон крајот на октомври, на веб-страницата беа објавени фотографии од Александар Цениќ (50), Александар Стојиљковиќ (50), Душко Димитријевиќ (50), Братислав Стојановиќ (41) и Нинослава Јовиќ (41). Тие се осомничени за извршување на спектакуларен грабеж на 28 јуни 2022 година, во Холандија, на саемот „The European Fine Art Fair“ (TEFAF), при што украле накит чија вредност се проценува на околу 40 милиони евра.
Холандското јавно обвинителство соопшти дека нуди награда од 20.000 евра за информации што би довеле до нивно апсење.
