Уништен системот кој ја чува „Палатата на Путин“ на Црното море: Украинците го дигнаа во воздух познатиот С-400

Во украинскиот напад со беспилотни летала погоден е рускиот систем за воздушна одбрана С-400 „Триумф“ распореден во близина на луксузниот комплекс на Владимир Путин на брегот на Црното Море во близина на Геленџик.

Лансерот се наоѓа на приближно 20 километри од резиденцијата позната како „Путинова палата“ и се користи за заштита на областа од авиони, беспилотни летала и крстосувачки ракети. Командантот на украинските сили за беспилотни системи, мајор Роберт Бровди, рече дека системот бил тешко оштетен со часови по нападот.

„Останал во пламен и гореше три часа откако бил нападнат од украински беспилотни летала“, рече Бровди, пренесе британскиот „Телеграф“.

С-400 е дел од поширок систем за заштита на комплексот, кој вклучува и средства за електронско војување и мобилни противвоздушни единици. Според достапните извештаи, околу резиденцијата постои безбедносна зона од околу 70 квадратни километри, додека над објектот е воспоставена трајна зона забранета за летови.

Бровди тврди дека лансерот за удар оттогаш е користен за напади врз украински градови. Според него, од него биле испукани шест ракети на 8 август.

Воените аналитичари велат дека Русија сè повеќе го користи С-400 во офанзивна улога, делумно поради сериозен недостиг на пресретнувачи на ракети „Патриот“, кои се клучна заштита од балистички ракети.

„Иако се помалку прецизни и смртоносни, тие сè уште претставуваат закана за цивилната инфраструктура, особено кога се лансирани кон густо населени области“, напиша Фабијан Хофман, експерт за ракетни системи на Универзитетот во Осло.

Луксузната резиденција во близина на Геленџик со години го привлекува вниманието на јавноста. Фондацијата за борба против корупцијата, која некогаш ја водеше покојниот руски опозициски лидер Алексеј Навални, во 2021 година процени дека изградбата на комплексот можела да чини дури 1 милијарда фунти. Навални почина во затвор во Сибир во 2024 година.