Украински беспилотни летала извршија напади врз две клучни цели длабоко во руската територија: воената воздухопловна база „Централни“ во Ростов на Дон и рафинерија за нафта во Јарослављ.
Според украинскиот Телеграм-канал „Exilenova+“, беспилотни летала ја нападнале воената воздухопловна база „Централни“ во регионот Ростов.
The “Central” air base in Rostov, Russia, has been struck. A large explosion can be seen. pic.twitter.com/WWrYjraWyO
— (((Tendar))) (@Tendar) September 17, 2026
Изворот тврди дека за време на нападот биле погодени авиони и инфраструктурата на базата, иако оваа информација сè уште не е независно потврдена. Објавените снимки прикажуваат силни експлозии на земјата – вклучително и големи секундарни детонации – како и интензивна активност на противвоздушната одбрана на небото.
Пожар во базата бил регистриран и од сателитскиот систем FIRMS на НАСА, кој ги следи топлинските аномалии и пожарите. Точниот обем на штетата, како и бројот на руски авиони што евентуално се оштетени или уништени, остануваат непознати.
Истовремено, нападната е и рафинерија за нафта во рускиот град Јарослављ. Гувернерот на регионот Јарослављ, Михаил Јеврајев, потврди дека рафинеријата била погодена од украински беспилотни летала и дека објектот претрпел штета.
По нападот избувнал пожар, поради што биле ангажирани службите за итни случаи и пожарникарите. Јеврајев подоцна соопшти дека пожарот е изгаснат.
Руските власти сè уште немаат објавено детали за обемот на штетата, ниту пак е познато дали нападот ќе влијае врз производството и работењето на рафинеријата.
