Украинската безбедносна служба го оквалификува пукањето во Киев како терористички чин

Истражителите на украинската безбедносна служба го окарактеризираа пукањето во саботата во Киев, во кое беа убиени најмалку шест лица, а најмалку 14 беа ранети, како терористички чин, истакнувајќи дека истрагата е сè уште во тек, пренесува Укринформ.

Одделно, украинскиот претседател Володимир Зеленски изјави дека бројот на повредени и убиени може да се зголеми, истакнувајќи дека меѓу повредените има и 12-годишно момче. Зборувајќи за напаѓачот кој беше убиен за време на полициската операција, Зеленски рече дека тој немал претходни кривични пресуди и долго време живеел во регионот Донецк во Украина.

„Сè што може да се знае за него и зошто го сторил ова сега се открива. Секој детаљ мора да се потврди. Истражителите имаат неколку верзии. Сите негови електронски уреди, неговиот телефон, сите комуникации ќе бидат проверени. Украинскиот министер за внатрешни работи Игор Клименко, Службата за безбедност на Украина и генералниот обвинител на Украина Руслан Кравченко ќе ја информираат јавноста. Сите проверени информации мора да им бидат доставени на нашите луѓе“, рече Зеленски.

Во саботата маж вооружен со автоматско оружје отвори оган врз минувачи на улицата во областа Демивка во Киев, а потоа влезе во супермаркет во областа Голосеивски, каде што зеде заложници, од каде што продолжи со пукањето. Тој беше убиен на лице место, за време на обидот на полицијата да го уапси. Се работи за Дмитриј Вајлиевич Василченков, 58-годишен маж роден во Москва.