Угостителите во трговскиот центар во Кочани сами ги отстрануваат бесправно доградените делови од јавните површини

Владко Грозданов, градоначалник на Општина Кочани, преку видеообраќање информираше за преземените активностите во врска со отстранувањето на бесправно изградените објекти на јавна површина пред угостителските објекти во трговскиот центар – блок А во Кочани.

Тој нагласи дека се спроведува законот на мирен, културен начин, заеднички, односно сопствениците на пицериите и кафетериите во трговскиот центар во Кочани започнале со отстранување на бесправно доградените делови од јавните површини, во согласност со законот и договорените рокови и обврски што ги утврдиле заеднички, на состаноците на почетокот од годината.

– Нивниот одговорен пристап е позитивен пример за почитување на законите и за заедничката грижа за јавниот простор. Со овие активности, обезбедуваме поголема безбедност, сигурност и проодност, што е најважно за безбедно движење на граѓаните. Јавните површини мора да бидат достапни и функционални за сите: за пешаците, родителите со деца, повозрасните лица и лицата со попреченост – наведе Грозданов пред граѓаните на Кочани. 

Притоа, додаде дека истите обврски, стандарди се применуваат за сите угостителски објекти на територијата на Општина Кочани.

– Нашата цел е уреден, безбеден и современ град во кој јавниот простор е во служба на граѓаните – дециден е Грозданов.

Отстранувањето на бесправно изградените објекти на јавни површини од страна на угостителите од катот на трговскиот центар – блок А во Кочани е последица на договорот меѓу градоначалникот Грозданов и самите угостители, од јануари оваа година.