Три лица се приведени при инцидент во Чегране: Едното од нив било затекнато со бела прашкаста матетрија, другите двајца со возило се обиделе да прегазат полицајци

Три лица од гостиварското село Чегране биле лишени од слобода откако едно од нив било затекнато со бела прашкаста материја, а другите двајца, според полицијата, со возило се обиделе да прегазат полициски службеници и им се заканувале по животот.

Како што информираат од Министерството за внатрешни работи, во четвртокот вечерта во 20:35 часот, полициски службеници од Надворешната канцеларија за криминалистички работи Гостивар го лишиле од слобода Х.С. (26) од Чегране. При преглед на патничко возило „мицубиши“, кое го управувал, била пронајдена и одземена бела прашкаста материја.

Подоцна, со судска наредба, бил извршен претрес во неговиот дом, при што, исто така, била пронајдена и одземена бела прашкаста материја.

За време на полициските дејствија пред домот на Х.С., со патничко возило „бмв“ пристигнале В.Ч. (24) и А.Н. (35), двајцата од Чегране. Според пријавеното, тие со возилото се обиделе да ги прегазат полициските службеници и им упатиле закани по животот, по што побегнале.

По преземените мерки, двајцата биле пронајдени и лишени од слобода.

Од МВР информираат дека по целосно документирање на случајот ќе следуваат соодветни пријави.