Трамп реагира на поразот на неговата партија на изборите за Конгресот, има порака за демократите

Американскиот претседател Доналд Трамп им честиташе на демократите за победата на изборите за Конгресот и изјави дека со нетрпение очекува да соработува со нив. Во телефонски разговор за „Си-Би-Ес Њуз“ (CBS News), тој додаде дека поседува „целосно право на вето“ и очекува дека демократите ќе сакаат да соработуваат со него.

„Мојата порака е: честитки до демократите, и со нетрпение очекувам да соработувам со вас за доброто на нашата земја“, изјави Трамп за „Си-Би-Ес Њуз“ доцна во вторникот вечерта, пренесува „Кликс“.

Тој напомена дека познава многу демократи.

„Имам целосно право на вето и сигурен сум дека ќе можеме да постигнеме договори. Мислам дека тие ќе сакаат да соработуваат со мене. Во спротивно, едноставно ќе ставам вето на сè, а тие тоа не би го сакале“, додаде тој.

Претходно во текот на денот, пред затворањето на избирачките места, Трамп зборуваше за „Си-Би-Ес Њуз“ за можноста демократите да ја преземат контролата врз Конгресот.

Според проекциите, демократите освоија мнозинство и во Претставничкиот дом и во Сенатот.

Во разговорот со „Си-Би-Ес Њуз“, Трамп повтори дека републиканците изгубиле бидејќи тој не бил на гласачкото ливче. Тој додаде дека, во одредени случаи, на гласачите не им се допаднале кандидатите – од кои некои „не му биле пријатели“ – што довело до тоа неговата база на поддржувачи да остане дома.

Во интервју за „Фокс Њуз“, тој рече дека е „малку изненаден“ од поразот на неговата партија. Исто така, истакна дека демократите „си ја завршиле работата добро“ и „се бореле силно“, а потврди и дека ќе ги прифати изборните резултати.