Трамп најави крај на воената финансиска помош за Израел

Американскиот претседател Доналд Трамп изјави дека Вашингтон ќе престане да обезбедува воена финансиска помош за Израел по крајот на оваа година, напоменувајќи дека постигнал договор за ова прашање со израелскиот премиер Бенјамин Нетанјаху.

„Му даваме на Израел четири милијарди долари годишно. Пред неколку месеци се договоривме тоа да го запреме“, рече Трамп во телефонско интервју за американската телевизиска мрежа „Фокс њуз“ (Fox News), како што пренесува „Тајмс оф Израел“ (The Times of Israel).

Тој изјави дека на Израел повеќе не му е потребна американска финансиска помош, бидејќи земјата станала економски и воено успешна, додавајќи, сепак, дека САД сепак ќе му помогнат на Израел доколку се појави потреба.

„Израел беше одличен сојузник, а ние бевме нивниот најдобар сојузник“, рече Доналд Трамп.

САД се најголемиот поединечен давател на воена помош за Израел. Според тековниот десетгодишен Меморандум за разбирање, Вашингтон му обезбедува на Израел 3,8 милијарди долари годишно, што ги покрива военото финансирање и противракетната одбрана.

Сепак, најавата на Трамп за прекин на помошта до крајот на оваа година не е во согласност со постоечкиот договор, кој останува на сила до крајот на 2028 година.

Израелскиот премиер Бенјамин Нетанјаху претходно во неколку наврати зборуваше за можноста за постепено укинување на американската воена помош; сепак, тој процес беше замислен да се одвива во текот на следната деценија, а не како моментален прекин на финансирањето, пренесе „Бета“.