Цените на бензинот во Соединетите Американски Држави ги покачува тоа што Украина ги уништува нафтените рафинерии во Русија, изјави денеска американскиот претседател Доналд Трамп, и додаде дека врз цената на горивото не влијае ситуацијата во Ормуската Теснина.
„Она што ја крева цената на бензинот веќе не е Ормуската Теснина – бидејќи сега речиси секојдневно се испорачуваат рекордни количества нафта – туку прашањето за рафинериите: оние во Русија што Украина ги разнесува и оние нашите што ги затвораат „Демократите“ во „сините“ сојузни држави, како Калифорнија“ напиша Трамп на Трут Соушл.
Рано денеска иранскиот бригаден генерал Али Фадави изјави дека Ормуската Теснина секако бил под иранска контрола за време на долгите месеци на судир.
– Американците се присутни во Персискиот Залив од 1853 година, но сега, за првпат, ниеден американски брод не е присутен не само во Персискиот Залив, Ормуската Теснина и Оманското Море, туку дури ни во северниот дел на Индискиот Океан – истакна тој.
Претходно повеќе американски медиуми пренесоа дека Трамп размислува да воведе забрана за извоз на дизел од САД, иако самиот Трамп тврдеше дека е оптимист во поглед на падот на цените откако протокот на нафта низ Ормуската теснина се зголеми во последните денови.
