Од Град Скопје информираат дека е во тек темелно чистење на Камениот мост и плоштадот „Македонија“.
Во рамките на овие активности се отстрануваат натписите, графитите и насобраната нечистотија, со употреба на специјално средство и чистење под притисок, за овие простори повторно да го добијат својот уреден и достоинствен изглед.
Скопскиот градоначалник, Орце Ѓорѓиевски и стакна дека Камениот мост и плоштадот „Македонија“ се лицето на нашиот град.
-Тука се среќаваат генерации, се пречекуваат гости и се создаваат спомени што остануваат за цел живот. Токму оттука многубројни туристи ја понесуваат својата прва слика за Скопје како град со душа, историја и препознатливо место на светската туристичка мапа. Затоа, овие симболи заслужуваат постојана грижа и внимание. Скопје заслужува да биде чисто, уредено и гордо на своите обележја. А сите ние имаме обврска да го чуваме она што ни припаѓа заеднички – изјави Ѓорѓиевски.
Тој додаде дека дополнително, привршуваат активностите за архитектонско осветлување на Камениот мост и за повторно пуштање во употреба на подната фонтана, која како што вели со години беше оставена да пропаѓа.
– Светлината и водата повторно ќе внесат живот и убавина во срцето на градот – заклучи Ѓорѓиевски.
