Новата сезона во Евролигата започнува денеска, а веќе сега вниманието го привлекуваат огромните суми што ги заработуваат најголемите ѕвезди. Платите одамна ја надминаа границата од еден милион долари, а најмалку десет кошаркари имаат годишни примања од над три милиони долари, без вклучени бонуси.
На врвот е повторно Василије Мициќ од Хапоел Тел Авив, кој според „Баскет њуз“ заработува околу 5,6 милиони евра, односно приближно 6,5 милиони долари. Српскиот репрезентативец се врати минатото лето во Европа по успешниот период во НБА и сега ја игра втората сезона од својот богат договор со израелскиот клуб.
Втор на листата е Најџел Хејс-Дејвис од Панатинаикос со околу пет милиони евра, додека неговиот соиграч Кендрик Нан заработува околу 4,5 милиони. Во топ-10 се уште двајца играчи на грчкиот гигант – Гершон Јабуселе со четири милиони и Силвен Франсиско со околу три милиони евра.
Актуелниот европски шампион Олимпијакос има еден претставник во топ-10 – Саша Везенков со околу 3,7 милиони евра. Високи примања имаат и Елајџа Брајант од Хапоел Тел Авив, Мфионду Кабенгеле од Дубаи, Еди Таварес од Реал Мадрид и Мајк Џејмс од Анадолу Ефес.
Според листата на „Баскет њуз“, топ 10 изгледа вака: Мициќ – 5,6 милиони евра, Хејс-Дејвис – 5 милиони, Нан – 4,5 милиони, Јабуселе – 4 милиони, Везенков – 3,7 милиони, Брајант – до 4,3 милиони, Франсиско – 3 милиони, Кабенгеле – 3 милиони, Таварес – 3 милиони и Џејмс – околу 2,9 милиони евра.
Сезоната допрва започнува, па останува да се види дали најплатените кошаркари ќе ги оправдаат огромните договори на теренот. Одговорите ќе ги добиеме од 24 септември, кога стартува новото издание на Евролигата.
