СПАС НА ПОВИДОК: Како да се избегнат долги чекања на границите на ЕУ?!

Европската Унија (ЕУ) воведува нова дигитална апликација наречена „Travel to Europe“ во обид да спречи гужви и потенцијални застои на граничните премини поради имплементацијата на новиот Систем за влез/излез (EES).
Целта на системот е дел од некои гранични процедури да ги префрли на дигитално ниво, пред патниците да пристигнат на самата граница.

Апликацијата им овозможува на корисниците однапред да ги достават своите податоци, вклучително и скенирање на нивните биометриски пасоши преку NFC технологијата, правење селфи за идентификација и одговарање на основни прашања за целта и времетраењето на нивното патување.

Откако ќе се обработат податоците, патникот добива баркод што му го покажува на службеникот на граничниот премин, што во теорија ја забрзува проверката. Сите податоци мора да се достават најмалку 72 часа пред патувањето.

Сепак, системот е сè уште во рана фаза на имплементација. Раните корисници пријавуваат технички потешкотии, додека на некои гранични премини сè уште им недостасува инфраструктура за таканаречени „брзи ленти“ за корисниците на апликацијата.

Официјалните информации за целосната имплементација на системот на поединечните гранични премини, сè уште не се потврдени.

Најголемите придобивки досега ги бележат патниците на главните европски аеродроми, каде што веќе се инсталирани автоматизирани системи за контрола.

Воведувањето на апликацијата доаѓа по предупредувањата дека новиот EES систем може да предизвика големи застои и одложувања, особено за време на туристичката сезона.

Дали „Travel to Europe“ навистина ќе ги забрза граничните премини или ќе стане дополнителен административен чекор, ќе се покаже во наредните месеци од имплементацијата на терен.