Сообраќајна несреќа на автопатот Куманово- Скопје – две лица загинаа, а три се повредени – возач од Скопје е лишен од слобода

Синоќа на автопатот Куманово-Скопје, кај Агино село, се случила тешка сообраќајна несреќа, во која две лица загинаа, а тројца се повредени.  Од МВР информираат дека возачот кој ја предизвикал сообраќајката е уапсен.

На 19.09.2026 околу 21:35 часот во СВР Куманово e пријавено дека на автопатот Куманово- Скопје, во насока кон Скопје, во атар на с.Агино Село, се случила сообраќајна несреќа помеѓу патничко возило „мерцедес“ со скопски регистарски ознаки, управувано од М.М. (65) од Скопје и патничко возило „опел корса“ со скопски регистарски ознаки, управувано од С.Н. (27) од Скопје. На местото на настанот починале сопатниците од возилото опел корса В.Н. ( 49) и Л.М. ( 71) од Скопје. Л.Н. (48), сопатничка од возилото „опел корса“ се здобила со тешки телесни повреди, а сопатничката Б.Н. ( 28) и С.Н. (27) од Скопје се здобиле со телесни повреди и биле пренесени во Комплекс клиники „Мајка Тереза“ во Скопје, стои во соопштението од МВР.

Од МВР информираат дека по извршен увид на екипа од СВР Куманово, а по наредба на јавен обвинител, возачот на патничкото возило „мерцедес“ М.М. бил лишен од слобода и по целосно документирање на случајот, против него ќе следува соодветна пријава.