Што се случува во Полска? Нов напад со нож во училиште во Варшава, полицијата врши апсења низ цела земја

Три лица се повредени во напад со нож во друго средно училиште во Варшава во понеделник, соопшти полицијата, што е најновиот во низата инциденти што предизвикаа загриженост во Полска за насилство меѓу младите луѓе кои се имитираат едни со други.

Напад со нож се случи денес во училиште во варшавскиот округ Прага, каде што 21-годишна жена нападна и повреди уште три лица.

Една од жртвите, 17-годишно девојче, е однесена во болница со посекотини на подлактицата, објавува полскиот портал „Полсатњуз“.

Портпаролот на варшавската полиција, командант Јацек Вишњевски, изјави дека нејзиниот живот не е во опасност. Двајцата други повредени не биле хоспитализирани.

Според очевидци, нападот се случил на вториот кат од училишната зграда.

„Тие биле заклучени во училница на вториот кат бидејќи сè се случувало во ходникот“, изјави едно лице на местото на настанот за Polsatnews.

Полицијата спроведува инспекции и апсења
Полската полиција претходно денес соопшти дека вчера извршила инспекција на околу 50.000 училишта и уапсила 79 лица низ целата земја по нападите во училиштата во Остролека и во близина на Вишков и спречениот инцидент во Серпце.

Во соопштението се вели дека за време на инспекциите се регистрирани повеќе од 230 инциденти, објави Polsatnews.

Полицијата нагласи дека спроведува операции низ Полска за да ја обезбеди безбедноста на децата, младите и сите вработени во образовните институции и постојано реагира на сите пријави.

Тинејџер донесе ранец со експлозиви во училиште
15-годишник во четвртокот нападнал три лица во основно училиште во Лешчидол-Новини, вклучувајќи и 37-годишен вработен, кој им подлегнал на повредите.

Денот претходно, во стручно училиште во Остролека, 19-годишен ученик избодел девет лица, вклучувајќи пет ученици и двајца наставници.

Тој имал и ранец со рачно изработени експлозиви.

Полицијата, исто така, спречила можен напад во училиште во Серпце, а 17-годишно момче, кое било уапсено поради закана дека „ќе направи нешто лошо“, било обвинето и притворено два месеци.

Училиштата и градинките во Мазовското Војводство, каде што се случиле нападите, во петокот биле ставени под дополнителен полициски надзор, со поддршка на градската гарда.