Што ги предизвика масовните морски топлотни бранови во Европа?

Климатските промени предизвикани од човекот доведоа до масовно ширење на морските топлотни бранови во европските мориња ова лето, со температури на водата во некои области до шест степени Целзиусови над нормалата, покажа нова анализа од меѓународна група научници.

Анализата на World Weather Attribution (WWA), објавена од Гардијан, покажа дека најтоплите двонеделни периоди регистрирани оваа година во три од четирите анализирани морски региони би биле речиси невозможни во прединдустриска клима, односно пред значително затоплување на планетата предизвикано од човекот.

Научниците го анализирале Келтското Море и околните води, Бискајскиот Залив и областа околу Иберискиот Полуостров, како и западните и источните делови на Средоземното Море.

Утврдено е дека климатските промени ги зголемиле температурите на водата за околу два степени во Медитеранот, 1,4 степени во Бискајскиот Залив и Иберискиот Полуостров и околу 1,3 степени во областа околу Ирска и Ламанш.

Проширувањето на областите погодени од морските топлотни бранови е особено изразено. Оваа година, тие зафатија околу 90 проценти од анализираната област на Бискајскиот Залив и Иберискиот Полуостров, и околу 80 проценти од западниот Медитеран.

Уште поизразена разлика беше откриена во источниот Медитеран, кој ги вклучува Јадранското, Јонското и Егејското Море. Речиси 70 проценти од оваа област беше погодена од морските топлотни бранови, додека во клима поладна за 1,4 степени, нивната очекувана покриеност би била само околу девет проценти.

Истражувачите предупредуваат дека екстремно топлите мориња би можеле да имаат сериозни последици за морските екосистеми. Високите температури можат да предизвикаат масовно изумирање на корали, сунѓери и макроалги кои создаваат живеалишта за други видови, а нивните последици потоа се пренесуваат на рибите, морските птици и цицачите.