Рускиот претседател Владимир Путин им предложи на американските претставници формирање на заедничка руско-украинска „хуманитарна мисија“ во градот Костјантинивка, во источна Украина, со образложение дека областа треба да се исчисти од мини за да се овозможи евакуација на цивилите.
Сепак, неговата понуда беше проследена со тврдења дека руските сили го контролираат градот – тврдење што Киев категорично го негира.
Предлогот беше изнесен за време на средбата во Москва на 12 ноември со американските претставници Џаред Кушнер и Стив Виткоф. Ова следи по дводневните мировни преговори за Украина, одржани во Абу Даби, кои не донесоа никаков значителен напредок кон ставање крај на војната, пренесува „Киев индепендент“.
Во разговорот, Путин предупреди дека преговорите би можеле да бидат долготрајни, истакнувајќи дека современите воени капацитети го отежнуваат утврдувањето кој навистина контролира одредени области на бојното поле.
„Прилично е тешко да се согледа ситуацијата на терен, со оглед на современите офанзивни капацитети“, забележа рускиот претседател.
Путин предложи организирање хуманитарна операција во Костјантинивка, по моделот на онаа што претходно беше спроведена во Олешки, град во регионот Керсон. Според него, таквата мисија би ја олеснила евакуацијата на цивилите, а на Русија би ѝ биле потребни пет дена за да ја исчисти областа околу Костјантинивка од мини.
Сепак, украинската страна предупредува дека Москва би можела да ја искористи оваа иницијатива за воени цели. Советникот на украинскиот претседател, Дмитро Литвин, потсети дека претходната „хуманитарна мисија“ во Олешки – според тврдењата на Киев – им послужила на руските сили за ротација на војници и донесување дополнителен персонал, под превезот на привремен прекин на огнот.
„Јасно е зошто го сакаат тоа во Костјантинивка“, рече Литвин.
Костјантинивка е дел од таканаречениот утврден појас во регионот Доњецк, кој претставува една од главните пречки за руските напори да го окупираат целиот Донбас. Во градот се водат жестоки борби, а судирите се проширија и во урбаните делови.
Путин тврди дека руските сили ја контролираат Костјантинивка и дека Москва е подготвена да ги запре борбите за да им овозможи на цивилите да заминат. Според него, во градот останале меѓу 400 и 500 луѓе. Украинскиот Генералштаб, сепак, ги отфрла руските тврдења за заземање на градот и наведува дека украинските сили сè уште дејствуваат против руските пешадиски групи кои се обидуваат да навлезат во тоа подрачје.
Путин изјави дека, доколку украинските сили навистина го контролираат градот, Киев би требало да преземе соодветни чекори, вклучително и деминирање. „Во секој случај, ќе видиме кој го контролира тоа населено место“, рече тој.
Средбата со американските пратеници покажа дека Москва не се откажува од своите клучни барања, пренесува „Гардијан“. Путин уште еднаш ја отфрли можноста за распоредување западни трупи во Украина како дел од каков било потенцијален повоен мировен аранжман. Тој изјави дека Русија би ги сметала таквите сили за „легитимна цел“ и дека нивното распоредување би значело продолжување на војната.
Ова е клучно прашање за Киев, кој бара безбедносни гаранции – вклучително и улога на Европа во одржувањето на мирот по евентуалното постигнување договор.
Анализата на „Гардијан“ укажува на тоа дека пораките на Путин не покажуваат никаква подготвеност за компромис. Се наведува дека рускиот претседател повторно инсистирал на задржување на окупираните украински територии и изразил противење кон присуството на странски мировни сили. Истовремено, тој продолжува да се залага за пошироки дискусии околу промената на европската безбедносна архитектура и статусот на НАТО, каков што постои од 1997 година.
На разговорите во Москва учествуваа и соработниците на Путин – Јуриј Ушаков, Кирил Дмитриев и Владимир Медински (при што последниве ја предводеа руската делегација за време на преговорите во Абу Даби). По средбата со Путин, предвидено е Кушнер и Виткоф да се сретнат со украинскиот претседател Володимир Зеленски во Даблин и да го информираат за текот на разговорите. Кушнер им изјави на новинарите дека постојат „одредени можности и прилики“, но не даде дополнителни детали.
Првите преговори меѓу Русија и Украина по повеќемесечна пауза, одржани со посредство на САД, не резултираа со договор за прекин на огнот или мировен договор. Сепак, постигнат е договор за нова размена на воени заробеници, потврди Рустем Умеров, шефот на украинската делегација. Исто така, се разговараше за чекори кон поширок мировен договор и за повоена обнова на Украина.
„Првиот чекор е да се стави крај на војната и да се обезбедат безбедносни гаранции за Украина“, напиша Умеров на социјалната мрежа X.
