Шок во светот на тенисот: Ник Кирјос падна на допинг тестот поради кокаин

Ник Кирјос е привремено суспендиран од тенисот откако беше позитивен на кокаин. Австралиецот даде примерок за време на Отвореното првенство на Мајорка на 22 јуни, а последователната анализа откри присуство на бензоилекгонин, метаболит на кокаинот.

Меѓународната агенција за интегритет на тенисот соопшти дека Кирјос може да се жали на привремената суспензија, „но досега не го стор тоа“.

Во објава на Инстаграм, Кирјос рече дека направил „огромна грешка“ и ја презел „целосната одговорност“ за неа. За време на суспензијата, на Кирјос не му е дозволено да игра, да тренира или да присуствува на официјални турнири.

31-годишниот Австралиец одигра само четири натпревари во поединечна конкуренција оваа сезона, откако се мачеше со повреди во последните години.

Последен пат играше во машки двојки на Вимблдон, каде што тој и неговиот партнер Александар Бублик беа поразени во првото коло.

Во долга објава на Инстаграм, Кирјос рече дека повредите во последните години „му зедоа огромен данок, и ментално и физички“.

„Моето тело не можеше да го направи она што мојот ум го очекуваше. Помирувањето со фактот дека се ближам кон крајот на мојата кариера беше потешко отколку што некогаш замислував.

Ништо од тоа не го оправдува она што го направив“, напиша Кирјос.

Тој, исто така, објави дека ќе земе 28-дневна пауза од социјалните медиуми и јавниот живот за да „се фокусира на враќање на вистинскиот пат“.

Бројни казни

Кокаинот е класифициран како стимуланс и е на листата на забранети супстанции на Светската антидопинг агенција. Кирјос е една од најконтроверзните личности во светот на тенисот со години.

Неговото однесување на теренот често беше предмет на критики, а тој доби бројни големи казни во текот на својата кариера за кршење рекети, пцуење и судир со судии, пишува Би-Би-Си.

Во 2023 година, тој призна дека нападнал поранешна девојка две години претходно, но избегна кривични обвиненија. Следеа дополнителни критики за серија коментари што ги даде, кои беа оценети како мизогини.

Кирјос, исто така, отворено зборуваше за своите проблеми со менталното здравје во минатото. Тој рече дека „искрено размислувал“ за самоубиство и дека по поразот на Вимблдон во 2019 година, поминал некое време во психијатриска болница во Лондон.