Шест точки за прекин на конфликтот со Иран: Што бараат САД од Техеран?

По три недели војна, администрацијата на Доналд Трамп започна прелиминарни разговори за следната фаза од конфликтот и можни мировни преговори со Иран.

Во разговорите, според американски функционер и извор запознаен со ситуацијата, учествуваат специјалниот пратеник Стив Виткоф и зетот на Трамп, Џаред Кушнер, објавува Аксиос.

Во последните денови немало директен контакт меѓу САД и Иран, а комуникацијата се одвива преку посредници – Египет, Катар и Обединетото Кралство. Египет и Катар ги информираа САД и Израел дека Иран покажува интерес за преговори.

„Нашиот став е дека го запревме иранското напредување“, рече американски функционер, изразувајќи увереност дека Иранците ќе се согласат на преговори.

Функционерот, како што пренесува Аксиос, рече дека САД бараат од Иран да се обврзе на шест точки.

Првото барање е петгодишно прекинување на неговата ракетна програма.

Второто е целосна забрана за збогатување на ураниум.

Третиот услов е демонтирање на реакторите во нуклеарните постројки Натанц, Исфахан и Фордоу, кои САД и Израел ги бомбардираа минатата година.

Четвртиот услов е воспоставување строги надворешни протоколи за следење на создавањето и употребата на центрифуги и сродни машини што би можеле да се користат за развој на програми за нуклеарно оружје.

Петтиот услов е склучување договори за контрола на оружјето со земјите во регионот, што вклучува ограничување на бројот на ракети на максимум 1.000.

Шестиот услов е прекин на финансирањето на прокси групи како што се Хезболах во Либан, Хутите во Јемен или Хамас во Газа.