Седум републиканци во Претставничкиот дом на САД им се придружија на демократите во гласањето за резолуција со која се повикува претседателот Доналд Трамп да ги прекине воените операции на САД против Иран.
Резолуцијата беше усвоена со 220 гласа „за“ и 204 „против“. Ова е третпат Претставничкиот дом да усвои слична мерка. Овој пат, таа беше поддржана од седум републиканци, додека претходните две резолуции имаа поддршка од по четворица републикански пратеници.
Тројца републиканци за првпат поддржаа ваква резолуција: Маријанет Милер-Микс и Зак Нан од Ајова, како и Ненси Мејс од Јужна Каролина. Томас Маси од Кентаки, Том Барет од Мичиген, Ворен Дејвидсон од Охајо и Брајан Фицпатрик од Пенсилванија повторно гласаа за резолуцијата.
„Нема да поддржам уште една бескрајна војна. Можеме да ги заштитиме Американците, да вршиме притисок врз Иран и да се стремиме кон мир, а истовремено да обезбедиме Конгресот да ја исполни својата уставна одговорност“, изјави Нан по гласањето.
Резолуцијата се повикува на Законот за воени овластувања и бара повлекување на вооружените сили на САД од непријателствата со Иран, со исклучоци кои се однесуваат на одбраната на базите на САД и на сојузниците.
Резолуцијата од ваков вид на Претставничкиот дом сама по себе нема законска сила ниту правно го обврзува претседателот, таа, всушност, го претставува официјалниот став на тој дом на Конгресот во врска со воениот ангажман на САД.
