Саудиска Арабија го рестартираше нафтоводот „Исток-Запад“ и би можела да го продолжи извозот на нафта од пристаништето Јанбу на Црвеното Море подоцна во текот на денот (вторник), според три извори запознаени со ситуацијата.
Нафтоводот беше затворен на 13 септември по нападите со беспилотни летала, со што беше запрен утоварот на сурова нафта во пристаништето Јанбу.
Обновувањето на испораките во вторникот доведе до пад на цените на светските пазари. Фјучерсите на суровата нафта од типот „Брент“ поевтинија за повеќе од два долари по барел, достигнувајќи го најниското ниво од 8 септември.
Од почетокот на прекинот на протокот на нафта низ Ормускиот теснец – по војната на САД и Израел против Иран – Саудиска Арабија го користеше овој нафтовод за пренасочување на околу четири милиони барели дневно кон пристаништето Јанбу, што претставува околу четири проценти од глобалното снабдување.
По рестартирањето, нафтоводот работел со намален капацитет, наведоа два извори.
Државната компанија „Сауди Арамко“ има за цел да го зголеми протокот на четири милиони барели дневно, иако не е јасно кога би можел да се постигне полниот капацитет.
Нафтоводот повторно ќе испорачува сурова нафта до рафинериите на „Арамко“ на брегот на Црвеното Море. Испорака на саудиска нафта наменета за Кина треба да се натовари во пристаништето Јанбу подоцна во вторникот.
Два извори од секторот за тргување посочија дека трговците се подготвуваат за утовар на саудиска нафта, при што танкерите се движат кон египетските пристаништа Порт Саид и Сиди Керир за префрлање на товарот од брод на брод, пренесе Вјести.ба.
