среда, ноември 18, 2026
Дома КУЛТУРА Сара Климоска со работилница за глума на осмиот фестивал „Ѕирни“

Сара Климоска со работилница за глума на осмиот фестивал „Ѕирни“

437

Осмото издание на фестивалот на филм и на музика „Ѕирни“ ќе се одржи од 28 септември до 5 октомври, на две локации во Скопје, во „Котур кафе“ и во Домот на АРМ. Филмската програма е поделена на интернационална и на национална официјална селекција, која брои седум скопски премиери на македонски кратки филмови, како и студентска селекција, но и три специјални проекции на кратки филмови на членови на тимот на „Ѕирни“. Филмовите од официјалната селекција ќе се натпреваруваат за наградата „Данчо Чеврески“, од студентската – за најдобар студентски филм, а 14 филма од целата филмска програма се во трка за најдобар филм според публиката. Покрај кратките филмови, во соработка со „Македокс“, ќе биде прикажан и еден долгометражен документарен филм: „Југо оди во Америка“, како и театарската претстава „Казабалкан“ во режија на Дамјан Костовски, по сценарио на Горан Стефановски.

Годинашното жири што одлучува за најдобар филм во официјалната селекција е во состав: Василис Терзополус, селектор на филмскиот фестивал за краток филм „Драма“ од Грција; Сара Климоска, македонска актерка и режисерка и Дарко Набаков, директор на фестивалот „Македокс“. Жирито, пак, што ќе одлучува за најдобар филм во студентската селекција ги вклучува: Тамара Ристоска, актерка; Атанас Велкоски, снимател и коселектор на кратката програма на ИФФК „Браќа Манаки“ и Игор Христов, режисер.

Придружната едукативна програма е распределена во текот на сите фестивалски денови и ќе почне со мастерклас на директорот на фотографија Самир Карахода, каде што публиката ќе има шанса да ги гледа неговите кратки филмови „In between“, „Displaced“ и „On the way“. Понатаму ќе се одржи работилница за глума пред камера и селфтејп-кастинг со Сара Климоска, како и панел-дискусија на тема „Жените што ги прават филмовитe реалност“ со продуцентките Ивана Шекуткоска, Сара Ферро и Марија Димитрова. Ќе има и панел-дискусија на тема „Улогата на фестивалите во креативното патешествие на краткиот филм“ со Марија Апчевска и Атанас Велкоски од „Браќа Манаки“, Петрула Велјановска од „Македокс“ и Василис Терзополус од фестивалот „Драма“. Едукативната програма ќе се заокружи со традиционалниот 48-часовен филмски предизвик предводен од Игор Христов и од предавачите Тамара Ристоска, Атанас Велкоски и Радован Петровиќ.

Музичката програма годинава брои седум диџеј-сета, меѓу кои Бојан Јанев, Андреа Салпе, Еми Ермилова, Давид Николовски, Андреј Влашки и Диџеј Чваре, Боле и Дабл Џи, како и пет концерти на бендовите „Оркестр ту пвисан Марсел Дишан“ од Швајцарија, „Лелее“ од Словенија, „Роза“ од Србија и домашните „Сам“ и „Хот џез-квартет“. Во рамките на придружната програма, ќе се отворат и две изложби: „Со сите наши чворови“ на Крстo Глигоријадис, курирана од Наде Циева, и групната студентска изложба „Во воздух“, во соработка со арт-платформата „Пионери“. Влезот за целосната програма на „Sирни 8“ е слободен.

ИЗДВОЕНИ