„Саботажа по налог на руските безбедносни служби“: Естонија ја обвинува Москва за подметнување пожар, Кремљ негира

Естонските власти денеска соопштија дека утврдиле оти пожарот што избувна во средината на август во објект на одбранбена компанија која испорачува воени возила за Украина, бил чин на саботажа извршен по налог на руските безбедносни служби.

Министерот за надворешни работи Маргус Цахкна изјави дека таквите дејствија се апсолутно неприфатливи и оти рускиот вршител на должност амбасадор во Талин е повикан во Министерството.

Во ноќта на 15 август, пожар избувна во зграда во Талин што ја користи „Милрем Роботикс“ (Milrem Robotics) – компанија која испорачува беспилотни копнени возила „THeMIS“ за Украина – но тој брзо бил ставен под контрола.

Во соседна Латвија, на 17 август беа приведени двајца осомничени, државјани на таа земја, а следниот ден беше приведен и трет; сите се екстрадирани во Естонија.

Естонската служба за внатрешна безбедност соопшти дека методот користен при нападот врз „Милрем“ се совпаѓа со други акти на саботажа извршени во Европа во име на Русија, дека „го оценува нападот како директно поврзан со Руската Федерација“ и дека заклучила оти подметнувањето пожар било „намерен и однапред планиран чин извршен по налог на руските безбедносни служби“.

Портпаролот на Кремљ, Дмитриј Песков, изјави дека таквите изјави се „неосновани, неодговорни, воопшто не ја одразуваат реалноста и не содржат никакви докази“. Не можеме сериозно да ги сфатиме таквите изјави, ниту пак ќе го сториме тоа“, рече Песков.

Западните претставници често ја обвинуваат Москва за водење кампања на саботажа и дестабилизација, насочена кон поткопување на поддршката за Украина и дестабилизирање на европските земји.

На почетокот на септември, Германија ја обвини Русија за претходен обид за напад со дрон врз украински товарен авион на аеродромот Лајпциг-Хале – објект од витално значење за снабдување на украинската одбрана – каде што беше откриен дрон што носел експлозив.