Родено бебе од ембрион замрзнат пред 22 години

Педесет и четиригодишна Гркинка роди бебе од ембрион замрзнат пред 22 години, откако го загубила својот 21-годишен син, кој бил зачнат преку истата постапка за вонтелесно оплодување, соопшти нејзиниот лекар во средата.

За Кристина Рапти-Целепи, ова раѓање има длабоко емотивно значење, објави на Фејсбук гинекологот Константинос Пантос од приватната клиника „Генезис“ во Атина.

„Во 2004 година, по трансферот на ембрион, таа роди сосема здраво машко дете уште при првиот обид“, објасни тој.

Сепак, нејзиниот син загинал во сообраќајна несреќа во октомври 2025 година, на 21-годишна возраст, наведува истиот извор.

„Во средата, таа роди девојче, откако во декември минатата година ѝ беше трансплантиран ембрион од истата серија што била користена и за зачнувањето на нејзиниот син“, изјави лекарот.

Кристина Рапти-Целепи има 54 години, што е максималната возраст дозволена во Грција за спроведување на постапката за вонтелесно оплодување.

Нејзиниот сопруг објасни дека семејството водело трка со времето за да ја износи бременоста до крај.

Тој повика на укинување на старосната граница за вонтелесно оплодување во Грција.

„Постарите жени поседуваат непроценлив капацитет да пружат зрела, свесна и безусловна љубов, како и стабилност што ниту една статистика не би можела целосно да ја измери“, изјави тој.