Американскиот претседател Доналд Трамп е сè понезадоволен од начинот на кој потпретседателот Џеј Ди Венс го поврзал изборниот пораз на републиканците на конгресните избори со војната со Иран, додека во приватни разговори го фали државниот секретар Марко Рубио како можен претседателски кандидат, објави „Њујорк тајмс“.
Во изминатите две недели Трамп им се жалел на соработниците и политичките сојузници дека Венс требало да нагласи оти претседателот донел исправна одлука кога ја започнал војната со Иран, наведува весникот, повикувајќи се на извори запознаени со неговите коментари.
Венс ден по изборите објави опсежна анализа на социјалните мрежи, во која ја критикуваше и комуникацијата на администрацијата пред гласањето.
„Причината поради која изгубивме е војната“, напиша тогаш потпретседателот.
Трамп првично делуваше смирено и пред новинарите изјави дека таа оценка е „главно точна“. Подоцна, сепак, и јавно навести незадоволство, посочувајќи дека Венс требало да даде „уште една изјава“.
„Ако требаше да одлучите повторно, дали би го направиле тоа? Одговорот е да“, рече Трамп, објаснувајќи што, според него, недостигало во анализата на Венс.
Набргу потоа го повлече Венс од преговорите со Иран и соопшти дека сака потпретседателот да се посвети на истрагата за наводни изборни измами во средините со демократска власт.
Соучесниците на Трамп, според „Њујорк тајмс“, истакнуваат дека Рубио во повеќе наврати повторил оти нападот врз Иран бил клучен за националната безбедност на САД.
Во интервју за весникот изјавил дека Трамп заслужува големо признание затоа што ги одобрил воените удари.
„На крајот, тоа е цената на лидерството: подготвеноста да се направат работи кои можеби не се политички популарни или корисни, но се неопходни за вашата земја и нејзината долгорочна иднина“, изјавил Рубио.
Трамп во вторникот јавно го пофали и на самитот на АСЕАН во Манила.
„Колку е популарен Марко, а? Дали Марко работи одлична работа? Беше фантастичен“, рече американскиот претседател.
Рубио претходно изјави дека би го поддржал Венс и ги отфрли написите дека ќе ја напушти администрацијата за да се кандидира за претседател. Сепак, дел од неговите сојузници тврдат дека би влегол во претседателската трка доколку Трамп го поттикне на таков чекор.
Запрашан неделава во интервју за „Фокс њуз“ дали постојат несогласувања меѓу него и претседателот, Венс изјави дека нема разидувања „меѓу претседателот и кој било друг висок функционер во администрацијата“.
Во врска со евентуалната кандидатура на претседателските избори во 2028 година, рече дека сè уште нема донесено одлука.
„Ќе го разјасниме тоа некаде следната година“, изјави Венс.
Неговите сојузници за „Њујорк тајмс“ тврдат дека тој навистина се двоуми. Како причини поради кои би можел да се откаже од претседателската трка ги наведуваат младото семејство – во јули го доби четвртото дете – и непопуларноста на војната.
Некои сметаат дека неговите шанси за победа би се намалиле драстично доколку Трамп продолжи со големите воени операции во Иран.
По изборниот пораз на републиканците, на кој демократите остварија најголема победа на меѓуизбори од изборите по аферата Вотергејт, за претседателската кандидатура размислуваат и сенаторот Тед Круз и гувернерот на Флорида, Рон Десантис.
Советниците на Трамп велат дека претседателот не брза да даде поддршка за својот наследник.
Белата куќа не одговорила на прашањата на „Њујорк тајмс“, додека кабинетот на Венс одбил да коментира.












