Рачниот багаж повеќе нема да се плаќа, ќе биде вклучен во цената на авиобилетот

Земјите членки на ЕУ одобрија компромисен договор за реформа на правата на патниците во воздушниот сообраќај, отворајќи го патот за една од најголемите промени во европското воздухопловство во последните години. Новите правила ќе опфаќаат надоместок за доцнење и откажување на летовите, багаж, распределба на седиштата и постапка за поднесување барања.

Договорот беше поддржан од мнозинството земји членки, а пред да стапи во сила, треба да биде одобрен и од Европскиот парламент. Се очекува новите правила да почнат да важат во втората половина на 2027 година.

Една од најзначајните промени се однесува на багажот. Основната цена на авиобилетот ќе мора да вклучува не само мала торба што се вклопува под седиштето туку и рачен куфер на тркала. Патниците, сепак, ќе можат да се откажат од рачниот багаж и да добијат попуст на билетот.

Правилата предвидуваат и дека авиокомпаниите нема да смеат да им наплаќаат на родителите за седење покрај децата под 14 години, како ниту на лицата со попреченост и нивните придружници.

Доколку летот доцни најмалку три часа или е откажан, патниците ќе имаат право на компензација од 250 до 600 евра, во зависност од должината на патувањето. За летовите подолги од 3.500 километри, надоместокот ќе изнесува 300 евра за доцнења од три до четири часа и 600 евра доколку доцнењето надмине четири часа или е откажан летот.

Реформата носи и појасни правила за поднесувањето барања за надоместок, како и попрецизна дефиниција на вонредните околности кога авиокомпаниите нема да бидат обврзани да плаќаат отштета. Техничките дефекти на авионите нема автоматски да се сметаат за такви околности.