Пресврт на Блискиот Исток: Иран прогласи крај на операциите со еден услов, Израел ветува дека нема повторно да нападне

Иранските вооружени сили официјално објавија крај на воените операции против Израел, но со остро предупредување дека ќе следат уште поразорни напади ако Тел Авив продолжи со нападите врз Либан. Одлуката доаѓа кратко време по апелот на американскиот претседател Доналд Трамп и наводните пораки испратени од САД и Израел до Техеран.

Централната команда на Хатам ал-Анбија, клучното командно тело на иранските вооружени сили, го потврди прекинот на воените операции, а нивната драматична изјава ја пренесе полуофицијалната иранска новинска агенција Фарс.

Во официјално соопштение, иранското воено раководство нагласи дека нивната акција досега била успешна и дека претставува директна одмазда за израелските воени операции на либанска територија.

„По агресијата и злосторствата на бруталниот ционистички режим во јужен Либан и регионот Дахие, спроведени со поддршка на криминалната Америка, моќните вооружени сили на Исламската Република Иран, во поддршка на угнетениот народ на Либан, дадоа болен одговор на овој режим“, се вели во соопштението на штабот на Хатам ал-Анбија.

Сепак, од Техеран беше испратено недвосмислено предупредување: прекинот на воените операции е условен од однесувањето на Израел. Иранците изјавија дека доколку Израел продолжи со нападите врз јужна либанска територија, нивниот одговор ќе биде „многу посилен“ и поразорен од она што го видовме во последните денови.

Овој ненадеен пресврт на настаните на терен и смирувањето на тензиите доаѓаат откако американскиот претседател Доналд Трамп јавно и категорично побара од Израел и Иран „веднаш да прекинат со огнот“. Интервенцијата на Трамп дојде во време кога невидена размена на оган се закани целосно да ги уништи напорите за постигнување мировен договор и завршување на војната што економски го исцрпува целиот регион.

Израелскиот весник Израел Хајом, исто така, потврдува дека зад затворени врати се одвива интензивна дипломатска активност. Според нивните информации, постигнат е еден вид премолчен договор.

Израел и Соединетите Американски Држави испратија јасна порака до Техеран – гарантирано е дека нема да има нови израелски офанзивни напади, но само под услов Иран целосно да ги запре нападите.

Се чини дека овој ултиматум вроди со плод, барем привремено повлекувајќи го Блискиот Исток од работ на тотална војна. Очите на светската јавност сега остануваат вперени во следните потези на Израел, особено кога станува збор за операциите во Либан, што би можело да биде повод за ново будење на иранските ракети.