Крузерот „MВ Хондиус“ (МV Hondius), на кој тројца патници починаа од хантавирус, треба да пристигне во Тенерифе рано утрово, соопшти операторот на бродот.
„Подготовките во врска со нашата дестинација, процедурите за карантин и скрининг за сите гости и понатамошните планови за патување за сите патници и засегнатиот екипаж ги водат организации во голем број земји“, се вели во соопштението на Oceanwide Expeditions. Меѓу нив се Светската здравствена организација (СЗО) и холандските власти, а компанијата исто така тесно соработува со шпанските власти, се додава оттаму.
Според ажурираните податоци на СЗО, крузерот „МВ Хондиус“ немал сомнителни случаи меѓу 147-те патници на бродот до четврток, но периодот на инкубација, кој може да трае до шест недели, бара претпазливост. По пристигнувањето во пристаништето Гранадила во Тенерифе, властите ќе ја преземат одговорноста за медицинските процедури и потенцијалното враќање на патниците дома, соопшти „Оушнвајд експедишн“.
Соединетите Американски Држави во петокот објавија дека ќе ги евакуираат американските патници со авион. Три лица – постара холандска двојка и жена од Германија – починаа по епидемијата на малиот крузер што исплови од јужна Аргентина на 1 април со помалку од 150 лица на бродот. СЗО во петокот објави шест потврдени случаи на хантавирус, вклучувајќи три смртни случаи, меѓу осум сомнителни случаи. Генералниот директор на СЗО, Тедрос Аданом Гебрејесус, отпатува на Канарските Острови за да ја координира евакуацијата на патниците од бродот.
Гебрејесус ќе биде придружуван од шпанските министри за здравство и внатрешни работи „за да се обезбеди координација меѓу владините агенции, следење на здравјето и спроведување на планираните протоколи за надзор и одговор“, објаснија изворите. Многумина во Тенерифе протестираат против пристигнувањето на бродот.
Но, ризикот од ширење на хантавирусот кај глобалната популација е „апсолутно низок“, соопшти во петок Светската здравствена организација. „Ова е опасен вирус, но само за лице кое е всушност заразено. Ризикот за општата популација останува исклучително низок“, изјави портпаролот на СЗО, Кристијан Линдмаер, во Женева. Патниците мора да се симнат од крузерот помеѓу пладне во недела и понеделник, „единствената можност“ поради времето, изјави официјален претставник на регионалната влада на Канарските Острови.
Луѓето кои се плашат дека можеби биле заразени или имаат потврдена инфекција со хантавирус моментално се под медицински надзор или во самоизолација во неколку земји, вклучувајќи ги Обединетото Кралство, Франција, Германија, Холандија, Швајцарија и Јужна Африка. Според „Скај њуз“, британските здравствени власти, исто така, објавија трет сомнителен случај на инфекција кај британски патник кој претходно се истоварил на оддалечениот остров Тристан да Куња во Јужниот Атлантик.
Двајца британски државјани веќе се потврдени заразени – едниот се лекува во Холандија, а другиот во Јужна Африка. Вкупно четири пациенти моментално се хоспитализирани во болници во Јужна Африка, Холандија и Швајцарија, додека еден сомнителен случај во Германија подоцна бил негативен. Светската здравствена организација верува дека првиот случај на инфекција веројатно се случил пред качувањето, веројатно за време на патувањето во Аргентина или Чиле, по што вирусот веројатно се проширил на бродот. Станува збор за вирусот од Андите, редок вид хантавирус што може да се пренесува меѓу луѓето, иако СЗО нагласува дека ризикот за општата популација останува исклучително низок.
Дополнителна загриженост предизвикуваат и податоците од Аргентина, каде што бројот на случаи на хантавирус брзо се зголемува. Според CNN, земјата регистрирала 101 потврден случај на инфекција и дури 32 смртни случаи од јуни минатата година, што е речиси двојно повеќе од бројот на случаи една година претходно и најголем број на инфекции од 2018 година. Аргентинските власти се обидуваат да ги реконструираат движењата на холандскиот пар кој подоцна почина на крузерот MV Hondius, а се верува дека тие патувале низ неколку делови од Аргентина и Чиле, каде што вирусот е ендемски, пред да се качат на бродот. Експертите веруваат дека зголемувањето на бројот на случаи е поттикнато од климатските промени, уништувањето на живеалиштата и зголемениот контакт на луѓето со дивите животни. Хантавирусот најчесто се пренесува преку измет и урина на заразени глодари, но сојот од Андите, кој е поврзан со епидемијата на крузер, во ретки случаи може да се пренесе меѓу луѓето преку близок и продолжен контакт.
Сепак, експертите нагласуваат дека ситуацијата не е споредлива со пандемијата Ковид-19. Професорката Шарлот Хамер од Универзитетот во Кембриџ изјави за CNN дека вирусот не се шири лесно меѓу луѓето и дека крузерот е специфична средина поради продолжениот престој на голем број луѓе во затворени простори. „Ова не е вирус што можете да го добиете само со поминување покрај заразено лице“, рече таа.
