Голем пожар избувна денес на товарно-патничкиот брод „Blue Carrier 2“ додека пловеше северно од грчкиот остров Миконос; сите 29 лица на бродот – вклучително 28 членови на екипажот и еден возач на камион – беа евакуирани.
Бродот, кој плови под грчко знаме, превезуваше речиси 200 камиони и автомобили. Евакуираните лица беа префрлени на друг брод, кој ќе ги однесе до блискиот остров Тинос. Според досегашните информации, нема повредени.
Грчката крајбрежна стража соопшти дека пожарот избувнал на палубата на траектот; на местото на настанот беа испратени пловни објекти на крајбрежната стража, противпожарни бродови и влекачи.
Според јавниот сервис ERT, причината за пожарот засега е непозната, а операцијата за справување со ситуацијата е во тек.
