ПОЛИТИЧКА КРИЗА ВО ГЕРМАНИЈА: Мерц ги нарече изборните порази „катастрофа“, но одбива да поднесе оставка

Германскиот канцелар Фридрих Мерц ги оцени како катастрофа двата порази што неговата партија, Христијанско-демократската унија (ЦДУ), ги претрпе на регионалните избори, но порача дека нема намера да ја напушти функцијата.

Во североисточната сојузна покраина Мекленбург-Западна Померанија, ЦДУ не успеа да го помине изборниот праг од пет проценти потребен за влез во парламентот, остварувајќи резултат дури и полош од веќе песимистичките прогнози кои предвидуваа најлош резултат на партијата во тој регион.

Крајно десничарската партија „Алтернатива за Германија“ (АфД) беше на пат да освои најмногу гласови во Мекленбург-Западна Померанија, но малку е веројатно дека ќе формира власт бидејќи другите партии одбиваат соработка со неа. Истовремено, во Берлин, владејачката ЦДУ беше на пат да загуби од партијата „Ди Линке“ (Левица).

Мерц се наоѓа под сè поголем притисок по неколкумесечните слаби резултати во анкетите за популарност, а се појавија и гласини дека би можел да биде заменет среде мандатот во рамките на „смена на канцеларот“. Двата регионални избори се одржаа вчера, две недели откако ЦДУ го преполови бројот на гласови во сојузната покраина Саксонија-Анхалт, каде што АфД постигна значајна победа.

Повторувајќи ги коментарите што ги изнесе по тој пораз, Мерц им изјави на новинарите во седиштето на партијата во Берлин дека ќе продолжи со плановите на коалициската влада за спроведување на пакет економски, даночни и социјални реформи.

— Реформите мора да се спроведат. Ја преземам оваа одговорност бидејќи сакам да ја придвижам нашата земја напред. Она што треба да се направи сега бара решителност, постојаност и трпение. Тоа ќе го покажам како претседател на ЦДУ и, пред сè, како канцелар на нашата земја. Би се осмелил дури и да кажам дека овие реформи се противотров за авторитарниот отров кој, преку привлечноста на авторитаризмот, сè подлабоко навлегува во нашето општество — изјави Мерц.

Националната копретседателка на АфД, Алис Вајдел, изјави дека партијата е најсилната политичка сила и дека станале дел од политичкиот мејнстрим кај населението.Одредени ограноци на популистичката АфД се класифицирани од домашните разузнавачки служби како десничарски екстремистички, што партијата одлучно го отфрла.

Сепак, нејзината политика на противење на имиграцијата, застапувањето на приоритетот на германските интереси и наклонетоста кон Русија наидоа на плодна почва во источниот дел на земјата, некогашната комунистичка Источна Германија. На изборниот собир на ЦДУ во Берлин, реакциите на излезните анкети беа воздржани. Кога на екранот се појавија проекциите на резултатите, немаше ниту славење ниту ентузијазам.

Станува збор за партија која е свесна дека се наоѓа во сериозни проблеми, а нејзиниот лидер брзо премина во офанзива, порачувајќи дека никаде не оди.

Мерц долго време ја посакува највисоката политичка функција во Германија и најверојатно нема лесно да се откаже од неа, пренесува Би-би-си.