Заедницата на единиците на локална самоуправа (ЗЕЛС) потпиша меморандум за соработка со Министерството за демографија и млади и со Националниот младински совет на Македонија за повеќе можности, посилна поддршка и за поголемо учество на младите во општините.
Меморандумот предвидува зајакнување на соработката меѓу локалните самоуправи и младите, меѓу другото и преку мрежата на општински службеници за млади, која ќе придонесе за подобро препознавање и реализација на младинските иницијативи и предлози.
– Младите треба да бидат активни партнери во креирањето на локалните политики. Наша обврска е да создадеме услови нивните идеи да бидат слушнати, поддржани и преточени во конкретни резултати – беше истакнато на потпишувањето.
Како позитивен пример беа посочени активностите во Скопје, каде што се преземаат чекори за формирање младински хаб и локален младински совет, како и создавање дополнителни простори за младински активности и иницијативи.
Со оваа соработка се очекува дополнително зајакнување на улогата на младите во локалните заедници и создавање услови за нивно активно учество, развој и реализација на потенцијалот во Македонија.
– Давам целосна поддршка за оваа мрежа. Ќе го ставиме нашето искуство во служба на подобра соработка меѓу општините, размена на добри практики и конкретни резултати за младите – изјави претседателот на ЗЕЛС, Орце Ѓорѓиевски.
ИЗДВОЕНИ
Граѓаните да не прават бизнис со државните станови и да не ги препродаваат по повисока цена
Натпреварувачи од 63 земји ќе трчаат на Скопскиот атлетски маратон, најстариот е Британец и има 79 години
Газдата годишно „кешира“ речиси 13.000 евра, а секој изработен час го плаќа 7,3 евра
Петмина лекари од битолската болница обвинети за несовесно лекување на 40-годишна пациентка
