Податочните центри на Амазон погодени од напади со дронови во ОАЕ и Бахреин

Амазон доцна синоќа објави дека два од неговите центри за податоци во Обединетите Арапски Емирати и еден објект во Бахреин биле оштетени од напади со беспилотни летала, со што биле ставени надвор од употреба.

Инцидентот се случил во недела наутро. Потоа компанијата објави на својата веб-страница дека „објекти“ ги погодиле центрите за податоци во ОАЕ, предизвикувајќи „искри и пожар“. AWS исто така соопшти дека истражува проблеми со електричната енергија и поврзувањето на локацијата во Бахреин.

Во најновото соопштение доцна синоќа, Амазон призна дека прекините биле предизвикани од напади со беспилотни летала поврзани со „тековниот конфликт на Блискиот Исток“.

„Во ОАЕ, два од нашите објекти беа директно погодени, додека во Бахреин, напад со беспилотни летала во непосредна близина на еден од нашите објекти предизвика физичка штета на нашата инфраструктура“, соопшти AWS.

„Овие напади предизвикаа структурни оштетувања, го нарушија снабдувањето со електрична енергија до нашата инфраструктура и во некои случаи бараа гаснење пожари, што доведе до дополнителни оштетувања од водата“, додаде AWS.

Меѓу погодените услуги се EC2, кој обезбедува капацитети на виртуелни сервери, услугата за складирање S3 и базата на податоци DynamoDB. Неколку апликации пријавуваат „зголемена стапка на грешки и намалена достапност“ поради инцидентот, објавува Index.hr.

Амазон соопшти дека работи на брзо враќање на услугите во регионот, но очекува закрепнувањето да потрае „со оглед на природата на физичката штета“. Компанијата најави ново ажурирање до полноќ по источно време или порано доколку се појават нови информации.

Додека ја поправа физичката штета на центрите за податоци, Амазон истовремено се обидува да го врати пристапот до податоци и достапноста на услугите во погодените региони, што не бара целосно враќање на објектите.

Амазон предупреди дека нестабилноста на Блискиот Исток веројатно ќе биде долгорочна и го прави бизнисот „непредвидлив“.