По инцидент со напад со нож: Дете пронајдено мртво во автомобил, други две деца и жена во критична состојба

Едно дете е пронајдено мртво, додека две други деца и една жена се борат за живот по инцидент со убоди од нож во австралиската држава Нов Јужен Велс.

Службите за итна помош биле повикани на улицата „Варата“ (Waratah Road) во Вали Хајтс, во областа Блу Маунтинс, во неделата попладне.

По пристигнувањето на местото на настанот, во автомобил биле пронајдени жена и три деца со убодни рани. Едно дете починало, додека другите две деца и жената биле пренесени во болница во критична состојба.

Според полицијата, неколку минувачи први им притекнале на помош на повредените и ги повикале службите за итна помош.

Двете преживеани деца, за кои се верува дека се на возраст под пет години, биле пренесени во Детската болница во Вестмид.

Жена на возраст од околу четириесет години била пренесена во болницата во Вестмид; нејзината состојба се опишува како критична.

Полицијата го обезбедила местото на настанот и започнала истрага за да се утврди што се случило.

Во моментов нема информации за околностите што довеле до нападот.

Од полицијата изјавија дека, во оваа фаза од истрагата, трагаат по други лица поврзани со случајот.

Истражителите упатија апел до јавноста секој што има информации за инцидентот – или снимки од мобилен телефон или од камера во возило – да стапи во контакт со нив.