Петер Маѓар осомничен за кражба на телефон: Парламентот му го укина имунитетот

Унгарскиот парламент денеска изгласа укинување на имунитетот на тројца функционери, вклучувајќи го и премиерот Петер Маѓар. Обвинителството води истрага против Маѓар поради сомнение за кражба, бидејќи тој, како што се наведува, за време на инцидент во ноќен клуб во јуни 2024 година земал мобилен телефон од еден маж и го фрлил во Дунав.

Маѓар негираше дека неговото однесување претставува кражба и оцени дека овој случај, во кој штетата се проценува на износ што едвај надминува 300 долари, е политички мотивиран.

Исто така, ги критикуваше обвинителите што побарале укинување на неговиот имунитет истовремено со имунитетот на двајца поранешни министри од периодот на власта на Виктор Орбан, чии наводни кривични дела вклучувале злоупотреба на десетици милиони долари јавни средства и примање милиони долари мито.

Пред гласањето, Маѓар им рече на пратениците дека „не извршил кривично дело“ и дека „презема одговорност за сите свои постапки“.

„Секој што нема што да крие истапува отворено“, рече тој, мислејќи на своето претходно барање неговата партија да гласа за укинување на неговиот имунитет.

Имунитетот на пратениците и другите функционери, вообичаена практика во европските демократии, е осмислен да ги заштити законодавците од политички прогон, овозможувајќи им да ги извршуваат своите должности и слободно да ги изразуваат своите мислења без страв од апсење или тужби од страна на власта.

Поранешната унгарска влада, предводена од десничарот Орбан, се обиде да го укине имунитетот на Маѓар додека тој беше пратеник во Европскиот парламент, но тоа тело повеќепати го одби тоа барање.

Пратениците денеска исто така гласаа за укинување на имунитетот на двајца поранешни министри во владата на Орбан, кои во одделни случаи се осомничени за кривично дело несовесно работење со 17,3 милијарди форинти (53,6 милиони долари) јавни средства, како и за примање повеќе од 12 милијарди форинти (37,2 милиони долари) на име мито и незаконски провизии.

Овие случаи вклучуваат некои од највисоките официјални претставници на владата на Орбан кои се вмешани во кривични дела што сега се истражуваат под новата администрација, во рамките на сеопфатните напори да се открие она што владата го опишува како повеќегодишна масовна измама и кражба на јавни средства за време на владеењето на Орбан.

Парламентот денеска му го укина имунитетот на Балаж Ханко, поранешен министер за култура во владата на Орбан, кој наводно ја надгледувал злоупотребата на околу 53,6 милиони долари од унгарскиот Национален фонд за култура.

Обвинителите тврдат дека Ханко лично интервенирал за да додели пари од фондот, наменети за поддршка на културни проекти, врз основа на политички критериуми, како и за покривање на трошоците за кампањата на партијата Фидес на Орбан во пресрет на изборите одржани во април.

Обвинителите исто така го сомничат поранешниот министер за развој на Орбан, Миклош Шестак, кому исто така му беше укинат имунитетот, дека примил повеќе од 37,2 милиони долари мито и провизии во врска со набавката на возила за унгарското државно автобуско претпријатие, како и за државни градежни проекти.

Пратениците од Фидес и коалицискиот партнер, Христијанските демократи, денеска не учествуваа во гласањето, оценувајќи ги обвинувањата против нивните пратеници како политичка тиранија на владата на Маѓар.

Ниту еден од функционерите на кои им е укинат имунитетот сè уште не е официјално обвинет.