Парадоксот на февруари: Европа се смрзнуваше, а светот го бележи еден од најтоплите во историјата

Февруари беше невообичаено студен во Европа оваа година, но според Европската служба за климатски промени Коперникус, тој се рангираше на петто место меѓу најтоплите во светот откако започнаа евиденциите.

Просечната глобална температура на воздухот во февруари достигна 13,26 степени Целзиусови, што е за 0,53 степени над просекот за периодот од 1991 до 2020 година, соопшти службата во месечниот извештај објавен во вторник. Во споредба со прединдустрискиот период од 1850 до 1900 година, месецот беше за 1,49 степени потопол.

Делови од западна Европа и северна Африка беа погодени од серија интензивни бури и обилни дождови. Франција, Шпанија, Португалија и Мароко беа погодени од силни поплави што предизвикаа голем број смртни случаи, значителна материјална штета и губење на средствата за живот за многу жители. Поплавите погодија и други региони во светот, како што се Австралија, Мозамбик и Боцвана.

Временските екстреми укажуваат на растечкото влијание на климатските промени и потребата од глобална акција, изјави Саманта Бургес, стратешки менаџер на програмата за клима „Коперникус“.

Во Европа, просечната температура на копното во февруари била минус 0,07 степени, малку под просекот од 1991-2020 година.

Во западна, јужна и југоисточна Европа регистрирале температури над просечните, додека постудени од нормалните услови биле забележани во Скандинавија, балтичките држави и северозападна Русија.

Севкупно, европската зима, која го опфаќа периодот од декември до февруари, била меѓу двете најстудени во последните 13 години, но сепак 0,09 степени потопла од просекот од 1991-2020 година.

Службата за климатски промени „Коперникус“ редовно објавува податоци за глобалните површински температури, морскиот мраз и врнежите врз основа на компјутерски генерирани анализи кои вклучуваат милијарди мерења од сателити, бродови, авиони и метеоролошки станици низ целиот свет.