Падна дрон во Бугарија: Силна експлозија на километар од клучниот гасовод

Бугарскиот претседател Румен Радев денеска изјави дека дрон влегол во бугарскиот воздушен простор од правец на Романија и експлодирал на околу 100 метри во внатрешноста на бугарската територија, во близина на поранешниот граничен премин „Кардам“.

Говорејќи по состанокот на Советот за безбедност на бугарската влада, Радев рече дека инцидентот се случил во 8:10 часот наутро, пренесува БТА.

Тој истакна дека инцидентот се случил на околу еден километар од компресорската станица на Трансбалканскиот гасовод, каде што дронот паднал во поле со сончоглед.

Областа е оградена, а според досегашните информации, нема повредени лица ниту штета на инфраструктурата.

Звукот на дронот бил регистриран од романската гранична полиција, по што единиците на бугарската гранична полиција во областа Генерал Тошево слушнале силна експлозија.

На местото на настанот се испратени екипи на граничната и националната полиција, како и персонал од Министерството за одбрана, за да се утврди видот на леталото.

Радев изјави дека дронот не бил детектиран ниту во романскиот, ниту во бугарскиот воздушен простор, ниту пак од страна на Здружениот центар за воздушни операции во Торехон, Шпанија, кој го надгледува воздушниот простор над јужна Европа.

„Врз основа на досега достапните информации, станува збор за еден дрон“, рече Радев, додавајќи дека поради штетата предизвикана од експлозијата, во моментов е невозможно да се утврди неговиот конкретен тип.

Според него, не се работело за мал дрон, туку за поголемо летало.

Тој наведе дека во моментов е невозможно да се утврди дали дронот намерно влегол во бугарскиот воздушен простор или дали носел товар, иако додаде дека содржел „значително количество експлозив“. Бугарскиот премиер објасни дека малите дронови тешко се откриваат, особено кога летаат на мали височини, што го оневозможува обезбедувањето доволно густа радарска покриеност.

Радев најави дека, по инцидентот, дел од опремата на граничната полиција за откривање и противдејство против дронови ќе биде преместена од турската кон романската граница.

Тој потсети дека Романија пред две недели соборила три дрона од типот „Шахед“, што ја поттикнало Бугарија да го засили радарскиот надзор во областа.

Исто така, тој најави дека за инцидентот со дронот што експлодираше на бугарска територија ќе се разговара на претстојниот состанок на Северноатлантскиот совет. Бугарските регионални власти соопштија дека нема оштетувања на граничниот премин „Кардам“, на блиската компресорска станица или на друга критична инфраструктура.

Немаше пожари ниту повредени лица.

Воени експерти ги испитуваат местото на настанот и остатоците, а конечните детали за видот на дронот се очекуваат по завршувањето на форензичката анализа.
Сообраќајот на граничниот премин „Кардам“ меѓу Бугарија и Романија не беше попречен.