Специјализираното обвинителство во Хаг побара шестгодишна затворска казна за поранешниот лидер на таканаречената ОВК, Хашим Тачи, во врска со случајот за попречување на правдата, при што побара оваа казна да не се пресметува во времето што тој веќе го поминал во притвор.
Во својот поднесок, обвинителството тврди дека времето што Тачи го поминал во притвор треба да се пресмета само во рамките на главниот случај за воени злосторства – во кој неодамна беше осуден на 25 години затвор – според извештаите на медиумите од Приштина.
Доколку судот го прифати барањето на обвинителството, вкупната затворска казна на Тачи пред Специјализираните совети во Хаг би изнесувала 31 година.
Тачи се наоѓа во притвор од ноември 2020 година во врска со случајот за воени злосторства, додека налогот за апсење за случајот за попречување на правдата против него стапи на сила во ноември 2024 година.
Обвинителството смета дека, со оглед на тоа што Тачи бил во притвор во текот на овие постапки поради обвиненија за воени злосторства и злосторства против човештвото, секое признавање на времето поминато во притвор треба да се примени исклучиво на казната за тој случај, наместо периодот на притвор да се смета двапати. На Тачи му се суди за попречување на правдата и обид за влијание врз сведоци, заедно со четворица други поранешни членови на таканаречената ОВК: Башким Смакај, Исни Килај, Фадил Фазлиу и Хајредин Кучи.
Според обвинението, во периодот од 12 април до 2 ноември 2023 година, за време на одделни, непривилегирани посети во притворскиот објект, Хашим Тачи им пренел на Смакај, Килај, Фазлиу и Кучи доверливи информации во врска со сведоците на обвинителството во посебен случај во кој се соочува со обвиненија за воени злосторства; тој им дал инструкции да влијаат врз сведочењата на сведоците на обвинителството и им дал детални насоки како да го сторат тоа. Тачи се соочува со три точки од обвинението за обид за попречување на службено лице во вршењето на службените должности преку учество во заедничка акција на група, четири точки за кршење на доверливоста на постапката и четири точки за непочитување на судот.
Што се однесува до другите обвинети во случајот за попречување на правдата, обвинителството побара казна затвор од три години за Башким Смакај, три години за Исни Килај, три години за Фадил Фазлиу и девет месеци за Хајредин Кучи.
Специјализираните совети во Хаг изрекоа првостепени пресуди против поранешните лидери на таканаречената… …на ОВК – Хашим Тачи и Јакуп Красниќи се осудени на по 25 години затвор, Кадри Весели на 18 години, а Реџеп Селими на 13 години затвор за воени злосторства.
