Случајот со бруталното врсничко насилство во Ѓорче Петров, кој деновиве ја вознемири јавноста по објавата на весникот ВЕЧЕР, доби и институционален епилог. Обвинителството веќе поведе постапка против четири малолетнички, а поднесени се и кривични пријави против нивните родители.
Од Основното јавно обвинителство – Скопје информираат дека е поднесено барање за поведување подготвителна постапка против четири деца во судир со законот, поради сомнение дека сториле кривично дело – насилство. Станува збор за една 17-годишна и три 14-годишни малолетнички, кои, според Обвинителството, во два наврати учествувале во напад врз 13-годишно девојче.
Постапката се води според Законот за правда за децата, а обвинителот побарал и мерки на претпазливост, имајќи ја предвид тежината на случајот и начинот на кој било извршено делото.
Паралелно, отворена е постапка и против родителите. До Обвинителството се доставени шест кривични пријави за запуштање и малтретирање дете, со сомнение дека пропустите во грижата и воспитувањето довеле до вакво насилство. Истрагата за овие наводи е во тек и се прибираат докази.
Претходно, од Министерството за внатрешни работи соопштија дека пријавите ги поднела полицијата во Ѓорче Петров, по утврдување дека четирите малолетнички извршиле физички напад врз 13-годишното девојче на крајот на март.
Случајот излезе во јавноста откако нашата редакција објави дека девојчето било изложено на брутално насилство – тепано, горено со цигари и понижувано, додека дел од настанот бил и сниман со мобилен телефон. По преживеаниот шок, детето завршило на лекарска и психијатриска помош.
Токму овие детали предизвикаа силни реакции кај јавноста и отворија прашања за тоа колку се продлабочува врсничкото насилство и дали институциите реагираат навреме. Министерката за образование, Весна Јаневска, ќе наложи да се воведат дежурства на наставниците во училиштата, за време на одморите, во ходниците на училиштата, но и во дворовите, по зачестените случаи на врсничко насилство.
(П. А.)
Женска ученичка група тепала, понижувала и горела со цигара помладо девојче
