Денес започна седницата на Генералното собрание на Обединетите нации на која присуствуваат околу 130 шефови на држави и влади за да разговараат за глобалните предизвици под мотото „Обновување на довербата, управување со трансформацијата: ОН што им служат на сите“.
Претседателот Трамп го започна својот говор фалејќи ја Америка, тврдејќи дека земјата доживува „златно доба“ и дека е посилна од кога било.
Во говорот што траеше околу триесет минути, тој ги повика нациите да се приклучат кон економската изолација на Иран сè додека земјата не престане со нападите врз трговските бродови и не се откаже од своите нуклеарни амбиции.
„Но, морам да донесам важна одлука – дали ќе се постигне договор со Иран што ќе му овозможи да се обнови и да стане многу поголема земја отколку што некогаш била? Или ќе ги испратам директно во пеколот, без шанса за опстанок и без надеж за одлична иднина или за идните генерации?“ – праша американскиот претседател Доналд Трамп.
Тој изјави дека „не е точно“ оти на САД им снемува муниција, и покрај неодамнешниот извештај на официјално тело за надзор при Пентагон, во кој се наведува дека клучните залихи на муниција на САД биле исцрпени за време на војната со Иран.
Тој истакна дека војната со Иран ја ослабела моќта на Техеран на Блискиот Исток, порачувајќи им на светските лидери дека Иран „веќе не е насилник“.
Во говорот, Трамп повторно тврдеше дека ставил крај на осум војни, при што, меѓу другите, ги спомена Србија и Косово.
Трамп изјави дека за време на својот втор мандат ставил крај или ги запрел осумте конфликти – меѓу Израел и Хамас, Израел и Иран, Египет и Етиопија, Индија и Пакистан, Србија и Косово, Руанда и Демократска Република Конго, Ерменија и Азербејџан, како и меѓу Камбоџа и Тајланд.
Исто така, зборуваше и за Венецуела, Мексико и Куба…
„Мојата администрација, исто така, се обидува темелно да ја промени ситуацијата во Куба, каде што комунистичкиот режим е под голем притисок. Под најголем притисок досега. Тоа е целосно пропадната држава“, рече Доналд Трамп.
По овој дел од говорот, кубанската делегација ја напушти салата.
„Комунизмот никогаш нема да дојде во Америка, но слободата ќе дојде во Куба, а безбедноста и сигурноста ќе дојдат во Мексико“, изјави Трамп.
Трамп најави дека САД „веднаш ќе го започнат процесот на воспоставување значително воено присуство“ на Гренланд, вклучително и „две многу големи воени бази“. Овој потег уследи само неколку дена откако тој тврдеше дека постигнал договор со Данска и Гренланд, со кој на неговата земја ѝ се доделува „трајна контрола“ врз безбедноста на островот.
Тој ги повика членките на Меѓународниот кривичен суд да се повлечат од институцијата, опишувајќи ја како „институција надвор од контрола“ и „зла група луѓе“.
