Нова спортска сала во училиштето „Димитар Поп Беровски“

Привршуваат градежните работи на новата спортска сала во ООУ „Димитар Поп Ѓорѓиев-Беровски“ во населбата Хром.

Градоначалникот на Општина Ѓорче Петров, Александар Стојкоски, заедно со претседателот на Владата на Република Македонија, Христијан Мицкоски, и со министерката за образование и наука, Весна Јаневска, денеска изврши увид во  активностите на терен.

Оваа сала претставува прв ваков спортски инфраструктурен проект во историјата на населбата Хром и ќе биде целосно опремена со шкафчиња, санитарии и со потребната инфраструктура. Нејзината намена е да биде достапна и функционална за учениците и за сите жители на ова населено место. Вкупната вредност на инвестицијата изнесува 19.730.000 денари со ДДВ, што ја прави една од најзначајните образовно-спортски инвестиции во ова подрачје.

Паралелно со овој капитален проект, во училиштето се реализираше и нова инвестиција од 1.500.000 денари, со која се овозможуваат нов влез со пристапна рампа, скали и патека, простор за нова трпезарија и кујна, реновирање на стариот дел од училиштето, проширување на ходниците, санација на оштетените делови од покривот.

Стојкоски истакна дека проектот е доказ за сериозниот пристап на Општината кон унапредување на квалитетот на животот на граѓаните.

Премиерот Мицкоски  нагласи дека ваквите спортски објекти се многу значајни и дека имаат апсолутна поддршка и сега, но ќе имаат и во иднина.

– Ние, како Влада, и во првиот и во вториот повик финансираме проекти овде, во Општина Ѓорче Петров, во вредност од околу 6-7 милиони евра. Така ќе продолжиме и во периодот што следува – изјави Мицкоски.