Нов биланс на жртви од рускиот напад врз хуманитарниот пункт во Запорожје: Загинаа најмалку 53 лица

Најмалку 53 лица загинаа при руско бомбардирање на пункт за дистрибуција на помош во југоисточниот регион Запорожје во Украина, според најновите официјални податоци за жртвите од нападот. Како што пренесува Ројтерс, нападот врз пунктот за дистрибуција на помош во регионот Запорожје – кој се случи во понеделникот – е еден од најсмртоносните напади врз цивили оваа година.

Вршителот на должноста регионален гувернер, Михајло Семикин, на „Телеграм“ изјави дека операциите за пребарување и спасување на локацијата, која се наоѓа во селото Комишуваха, влегоа во петтиот ден.

Украинската државна служба за вонредни состојби претходно извести за 50 загинати, напоменувајќи дека напорите за пребарување и спасување продолжуваат и покрај тешките услови и постојаната закана од нови руски напади.