„Некст ту сајленс“ со концерт во Сули ан во рамки на „Скопско лето“

Во Сули ан, на 9 јули со почеток од 20:30 часот, џез-групата „Некст ту сајленс“ (Next to Silence) ќе одржи самостоен концерт.

Концертот се одржува во рамките на фестивалот „Скопско лето“ и на него ќе се изведе музика што неодамна ја сними составот. Иако музиката сè уште не е издадена на албум, ова ќе биде ретка можност публиката да се запознае со карактерот на новите композиции на „Next to Silence“.

„Некст ту сајленс“ е македонски џез-состав што функционира повеќе години и е сочинет од членови што долго соработуваат со разни формации. Негови членови се: Кирил Кузманов – саксофон, Ади Имери – гитара, Филип Димишковски – клавијатури, Драган Стојковски – бас-гитара и Гоце Наумов – барабани. Оваа музичка група фаворизира специфичен џез-израз, кој не се вклопува во конкретни категории и истовремено има интеракција со духовни и саркастични елементи. Нивните албуми се издадени за „SJF Records“ на „Скопскиот џез-фестивал“ и тие отелотворуваат разни звучни стории и го раскажуваат она што најубаво се кажува без зборови. Иако името на бендот „Некст ту сајленс“ потекнува од реченица во џез-магазин, која ја објаснува музиката како „најубавиот звук покрај тишината“, сепак, неговата музика не е ниту најубав звук ниту тишина. Тaа е нешто помеѓу. Музиката на овој бенд би можела да биде повикување на различни приказни или звучен пејзаж лишен од значење… искуство што може да ве доведе до тишина.