Не e само нафтата на удар! Падна производството на клучен метал поради кризата во Ормутскиот теснец

Компанијата Алуминиум Бахреин (Алба) започна постепено затворање на производството во најголемата топилница за алуминиум во светот, поради прекини во снабдувањето и транспортот предизвикани од војната на Блискиот Исток, соопшти компанијата.

Како што пренесе Блумберг, Алба соопшти дека започнала затворање на три производствени линии кои заедно сочинуваат околу 19 проценти од нејзиниот вкупен капацитет од 1,6 милиони тони алуминиум годишно.

Компанијата соопшти дека привременото прекинување на производството ќе ѝ овозможи да ги зачува резервите на суровини и да ги одржи другите делови од фабриката во време кога превозниот сообраќај низ Ормутскиот теснец е сериозно нарушен.

Намалувањето на производството во Алба е најновото во низата прекини што влијаат на глобалната алуминиумска индустрија, бидејќи производителите гледаат нагло зголемување на цените, а трговците предупредуваат на потенцијални прекини во снабдувањето, појаснува Блумберг.

Цените на алуминиумот на Лондонската берза за метали го достигнаа највисокото ниво од 2022 година.

Како и другите топилници за алуминиум на Блискиот Исток, државната компанија на Бахреин се соочува со проблеми во испораката на метал до клиентите, како и со тешкотии во добивањето на алуминиум оксид (глиница), клучна суровина за производство на алуминиум, поради прекини во превозот низ Ормутскиот теснец.

Алуминиумот е најшироко користениот индустриски метал во светот по челикот, но пазарот е погоден од чести прекини во снабдувањето во последните години.

Шоковите ја истакнаа ранливоста на сложениот производствен синџир што вклучува рудници за боксит, рафинерии за алуминиум оксид и топилници за алуминиум што ги снабдуваат производителите низ целиот свет, честопати со специјализирани видови метал кои е тешко да се заменат брзо.