Пред досегашниот број на сметката ќе се додава ознаката „МК07“

Од денеска стапија во примена нови правила во домашниот платен промет, со кои ќе се користат банкарските сметки во меѓународниот ИБАН-формат. Пред досегашниот број на сметката ќе се додава ознаката „МК07“, но тоа не значи дека граѓаните добиваат нови сметки или дека треба да отворат нови.

Промената е, пред сè, техничка и има цел усогласување на домашниот платен систем со европските и со меѓународните стандарди. Парите остануваат на истите сметки, а граѓаните ќе продолжат непречено да ги користат мобилното и електронското банкарство, банкоматите и филијалите. Нема потреба од посета на банка, потпишување нови договори или повторно активирање на сметките.

Ќе има новина и кај платните налози. Досегашните обрасци ПП10, ПП30, ПП40, ПП50 и ПП53 ќе бидат заменети со нови, стандардизирани налози, достапни и во хартиена и во електронска форма. Ќе се променат и шифрите за означување на целта на плаќањето, кои наместо нумерички, ќе бидат четиризнаковни ознаки.

Банките самостојно ќе ги приспособат своите системи, а кај дел од нив бројот на сметката и понатаму ќе може да се внесува како досега, со автоматска конверзија во ИБАН-формат.

Поголемо приспособување ќе биде потребно кај компаниите што користат сметководствени програми и системи за масовно плаќање. За граѓаните, сепак, најважно е дека сметките и средствата остануваат исти, а се менува само начинот на нивно означување при плаќање.