Нагло интензивирани летовите на американските авиони околу Куба, како пред нападите на Венецуела и Иран

Летовите на американската воена разузнавачка служба покрај брегот на Куба нагло се интензивираа, според анализата на Си-ен-ен на јавно достапните податоци за воздушниот сообраќај.

Од 4 февруари, морнарицата и воздухопловните сили на САД извршија најмалку 25 лета на воена разузнавачка служба, користејќи летала со екипаж и беспилотни летала. Повеќето од нив беа снимени во близина на двата најголеми града на Куба, Хавана и Сантијаго де Куба, а некои беа на помалку од 65 километри од брегот, според податоците на „Флајт радар 24“. Повеќето од летовите беа извршени со авион за надзор и извидување, а дел со авион специјализиран за собирање сигнали и електронско извидување. Во операциите беа користени и неколку високолетачки извидувачки беспилотни летала.

Пред февруари, ваквите јавно видливи летови во областа беа исклучително ретки. Нивниот политички тајминг е, исто така, важен, според Си-ен-ен. Реториката на Трамп кон Куба значително се зацврсти во неделите што доведоа до овој пораст на активности. На својата социјална мрежа, американскиот претседател сподели коментар од соработникот на „Фокс њуз“, Марк Тисен, според кој Трамп ќе ја посети „слободната Хавана“ пред крајот на својот мандат. Само неколку дена по таа објава, Трамп нареди ембарго за нафта на островот. Тој отиде и чекор понатаму: воведе проширен режим на санкции против Куба. Тврди дека земјата е „закана“ за националната безбедност на САД. Кубанските претставници, од друга страна, ги отфрлаат тврдењата и велат дека се отворени за преговори, но во исто време, во случај на напад, би воделе долгорочна герилска војна против американските сили.

Сличен модел е виден и претходно: острата реторика на администрацијата на Трамп, проследена со зголемување на јавно видливите летови за надзор, им претходеше на американските воени операции во Венецуела и во Иран. Во случајот со Венецуела, Трамп на 2 септември објави дека американската војска извршила напад врз брод на наводен шверцер на наркотици на Карибите, директно поврзувајќи го со тогашниот претседател, Николас Мадуро, кого го обвини за „масовни убиства, трговија со дрога, трговија со луѓе, насилство и терор“. Јавно видливите летови за надзор по должината на венецуелскиот брег почнаа една недела подоцна. Тие продолжија, со прекини во октомври и ноември, сè до денот пред операцијата во која американските специјални сили го заробија Мадуро во неговиот комплекс во Каракас. Сличен развој беше забележан и во Иран, каде што многу поголема флота од американски разузнавачки авиони и беспилотни летала отворено го следеше јужниот брег на Иран пред заедничките американско-израелски напади. Авионите што беа забележани и во близина на Куба во последните недели, беа меѓу авионите активни и во конфликтот во Иран. Од почетокот на 2025 година, десетици од истите тие американски авиони за надзор оперираат околу украинската воена зона, во близина на геополитичките жаришта на Корејскиот Полуостров и по должината на западната руска граница, пишува Cи-ен-ен.

Но, зголемувањето на летовите по должината на кубанскиот брег е нов феномен и отстапување од претходните модели на распоредување на овие авиони. Сите наведени летови беа следени преку јавно достапни платформи за следење на воздушниот сообраќај со отворен код, а во некои случаи беа широко споделувани и на социјалните медиуми. Ова е особено значајно, затоа што тие авиони можеа да го скријат своето присуство со исклучување на транспондерите за локација. Ова го поставува прашањето дали Вашингтон намерно испраќа порака до кубанскиот режим: Погледнете, ние сме тука. Дали таа порака била свесно насочена од американската војска или администрација или не, за кубанските претставници, е, благо речено, вознемирувачка, заклучува Си-ен-ен.