Надал: Ова е тежок удар за Алкарас, но донесе правилна одлука

Легендарниот тенисер Рафаел Надал му даде поддршка на својот сонародник Карлос Алкарас, кој моментално закрепнува од сериозна повреда на зглобот поради која мораше да го пропушти мастерсот во Рим, како и Ролан Гарос.

Алкарас последен пат настапи на 14 април во Барселона, кога беше принуден да се повлече среде турнирот. Медицинските прегледи покажаа теносиновитис – воспаление на тетивата и на нејзината обвивка во пределот на палецот, предизвикано од голем напор и постојани повторувања на движењата.

Надал, кој низ кариерата се соочуваше со бројни повреди, истакна дека одлуката на Алкарас да паузира е исправна.

• Тој веќе не е почетник и знае како функционираат ваквите ситуации. Ова е тежок удар, особено во овој дел од сезоната, но најважно е што повредата не треба да стане хронична, изјави Надал.

Шпанската тениска икона откри и дека разговарал со Алкарас по повредата, бидејќи и самиот двапати имал сличен проблем со зглобот.

• Тоа е нешто што добро ми е познато. Разговаравме, но тие работи ќе останат меѓу нас, додаде Надал.

Сега, главното прашање е дали Алкараз ќе успее целосно да закрепне до Вимблдон и дали повредата ќе влијае врз неговиот агресивен стил на игра.

Во меѓувреме, Јаник Синер продолжува да доминира на АТП-листата и дополнително ја зголеми предноста во однос на Алкарас.